Skancia

Camín circular

2012-01-22T03:11:00.002+01:00

Siguió avanzando pel camín y volvió vela.
Siguía nel mesmu sitiu, si acasu un pasu más p’alantre.
Mirola, intentó sonrir ante los sos güeyos y dio otru pasu.
Dexola atrás y aceleró.
Morría de ganes de volver a atopala nel so camín circular.

Manifiestu de cineastes asturianos

2012-01-17T21:55:00.009+01:00

Dempués de delles tomes de contautu, alderiques ya momentos de poner y ceder toos un pocoñín, esti ye'l testu acordáu por un garapiellu de cineastes asturianos en relación al futuru del Festival Internacional de Cine de Xixón:

"Carta abierta a Emilio Marcos Vallaure y Carlos Rubiera

Envaloraos Srs. Conseyeru de Cultura y Deporte del Principáu d'Asturies y Conceyal de Cultura del Conceyu de Xixón:

Los embaxo firmantes, venceyaos a la escritura y la dirección cinematográfica n'Asturies dende va años, queremos volver manifesta-y la nuesa oposición a la destitución del direutor del Festival Internacional de Cine de Xixón, José Luis Cienfuegos, y la consiguiente rotura col modelu actual del certame.

Sofitamos la nuesa opinión nuna serie de fechos oxetivos y, entendemos, difícilmente discutibles:

1.- José Luis Cienfuegos llegó a la dirección d'un certame ensin vida, morrebundu. El Festival yera, entós, una amuesa de cine que nun tenía nengún pesu específicu nin na vida cultural de la ciudá nin na del País, y muncho menos nengún tipu de repercusión estatal nin internacional. A lo llargo de los años, edición tres edición y gracies a un trabayu duru y, munches vegaes, poco estimosu, Cienfuegos consiguió, cola calidá y el rigor na programación como bandera, convertir el FICXixón nun referente cultural pa la ciudá y d'ésta pal mundu, acoyendo un estilu de cine que cada vez ye más difícil ver nes pantalles.

2.- Entendemos, como direutores de cine, que'l FICXixón cumplió pa nós una irreemplazable llabor de formación, daqué bien importante a la d'enfrentanos, con un mínimu rigor, a nueses mesmes obres. En ciertos momentos, pa nós fueron más importantes les pantalles que les cámares. Tan importante pal nuesu trabayu ye tener un festival qu'acueya les nueses producciones como qu'esi mesmu festival nos avere dalgunos de los títulos más interesantes de la producción internacional añal.

3.- Les nueses películes, fueren meyores o peores, siempres atoparon la complicidá del FICXixón, que nos ufiertaba un espaciu profesional onde presentales con una repercusión que nun consiguiríamos per otres víes.

4.- Ante la desidia d'otres instituciones culturales asturianes en rellación a la creación cinematográfico y audiovisual, el FICXixón, tantu polos sos propios méritos como pol deméritu d'otros, convirtiose nel únicu referente válidu pa los cineastes asturianos, convertiéndose na única institución cultural que dio carta de naturaleza al nuesu trabayu.

5.- La única proyección estatal ya internacional que se dio a los nuesos trabayos dende Asturies producióse gracies a los ciclos que'l FICXixón entamó en festivales internacionales de tol mundu.

Pero'l motivu d'esta carta nun ye tantu'l llistáu refechu de lo que los cineastes asturianos debémos-y a la llabor que José Luis Cienfuegos desendolcó nel FICXixón, como denunciar el proyectu de destrucción al que conduz al certame'l nomamientu de Nacho Carballo como direutor del mesmu, asina como dar anuncia de la nuesa decisión de nun collaborar con esti nuevu modelu de festival.

1.- Consideramos indignu l'usu partidista que se ta faciendo del “cine asturiano” y d'esi indefiníu “toque asturianu” pa tomar esta decisión. Con esta carta queremos señalar que nun queremos que se nos utilice pa xustificar esti cambéu suicida nel rumbu del Festival Internacional de Cine de Xixón.

2.- Si de verdá tán esmolecíos pol desenvolvimientu d'una cinematografía asturiana y una industria audiovisual saniada, nun ye un festival internacional el primer sitiu nel que se debe intervenir. Creen una Dirección Xeneral de Política Audiovisual, movilicen una partida presupuestaria digna p'ayudar a la producción, nun afueguen pela vía de los fechos consumaos la Radio Televisión del Principáu d'Asturies (RTPA)… Hai munches coses que precisamos con urxencia. Si'l so anunciu de collaboración ye sincera, tamos abiertos al diálogu.

3.- Por tolo dicho, los embaxo firmantes anunciamos la nuesa decisión de nun participar nin coles nueses películes nin cola nuesa presencia nes actividaes que s'entamen na celebración de la 50ª edición d'un festival, el de Xixón, al que yá nun vemos como la nuesa casa.

FIRMES:
Alberto Arce, Luis Argeo, Ramón Lluís Bande, Sofía Castañón, Elisa Cepedal, Arantxa Cuesta, Óscar Fernández, Tom Fernández, Samu Fuentes, Sergio G. Sánchez, Samuel Gutiérrez, José Herrero, Santos Hevia, Iñaki Ibisate, Alejandro López Riesgo, Diego Llorente, José Luis Peñafuente, Pablo Quiroga, Jorge Rivero, Konchi Rodríguez, Aure Roces, Juan Luis Ruiz, Alejo Sabugo, Diego Taboada, Pedro Timón, Juan Tizón, Lucinda Torre, Luis Trapiello, Alberto Vázquez García, Fer Villafina, Pablo de María "

Esto yá non

2012-01-12T11:36:00.001+01:00

Les llimitaciones cognitives y socio-afectives tán patentes y presentes nun puñao de xente a la que-y tocó gobernar un país que, cansao de la rutina, echó una moneda a l’aire [ y salió cruz].

Estes mesmes llimitaciones cognitives y socio-afectives tán tamién presentes naquellos personaxes a los que los primeros apuntaron pa, dende los puestos de responsabilidá, poner nuevu rumbo al presente y futuru cultural de los sos conciudadanos.

Por mor de les distancies ente llendes del propiu País, ye bien fácil conocer, si tas dientro’l mundu audiovisual, a cuasi tolos y toles que se dediquen a esto de la cinematografía en dalguna de les sos vertientes. Poro, ye fácil conocer a cualesquiera que vayan a poner al mandu d’un timón decapitáu en hores.

Les llimitaciones cognitives y socio-afectives patentes nesi puñao de xente a la que-y tocó gobernar el País, lleguen a tal puntu que nun son quien a mirar pa los artífices de les resistencies culturales nos estremaos conceyos del País (les responsables culturales, los responsables de les cases de cultura, de les asociaciones culturales…) y entruga-yos poles necesidades reales qu'hai na población y polos engaños que sufrieren dalguna vez nestos últimos años.

Les llimitaciones cognitives y socio-afectives qu’amuesen los que lleven agora’l timón cultural nun quita pa reconoce-yos la so intelixencia pal engañu, pal despropósitu y pa lo de trepar peles cañaveres del éxitu, que tanto semaron y prauticaron toos estos años atrás.

La cosa ye que la xente esto, a la que-y tocó gobernar dempués d’echar la moneda a l’aire, diz que ye del País y que tolo que tan faciendo ye pa protexenos y pa danos unes hormones de crecimientu que van sirvinos pa danos a conocer, pa que nos visibilicen dende ú quiera. La cosa ye que dempués d’esto, dempués d’estes chambonaes, dempués d’estes polítiques y estes actitudes d’aculturización, cuando vuelvan echar la moneda a l’aire, naide nun va volver a creer que dende equí, dende esti País, pueden facese les coses bien.

Lo del Festival Internacional de Cine de Xixón, lo de la masacre que cometieron nunes hores ye’l claru exemplu del fatídicu rumbu que ta tomando tolo que tien que ver cola cultura internacional nesti País. Qué pena nun apreciar lo nueso y lo de fuera de les nueses llendes.

Yekini nun ye Quini

2012-01-06T00:05:00.005+01:00

- L’otru día que fui cola muyer a dar una vuelta taba Yekini vendiendo relós y carteres pel centru d’Uviéu
- ¿Yekini? ¿Cómo va ser Yekini? Sería otru…
- Non, yera Yekini, que se dedica a eso, ¿Nun sabes?
- Pero…
- Yo quedé fríu, y dixe-y a la paisana: "Mira Yekini a lo que se dedica"
- ¿Pero Yekini?
- ¡ SÍ H.ODER, YEKINI!

[Alderiques post partiu na llínia Molinón – Pumarín, Avientu 2010]

Seliquín - Xentiquina. Una ferramienta al serviciu de la escuela n'Asturies.

2011-12-31T11:54:00.000+01:00

Apuntes pa un diálogu d'amor XVIII

2011-12-24T23:35:00.004+01:00

[...]
- Tienes que colar, esti sitiu se te quedó pequeñu
- Yá, daqué tengo que faer, pero..
- Non, nun te puedes quedar equí
- Nun quiero colar
- Marcha, pero avísame cuando te vaigas dir
[...]

coses d' Algamar na TPA (2)

2011-12-06T02:05:00.001+01:00

coses d'Algamar

2011-12-03T15:20:00.003+01:00

Nel telediariu de la TPA falaron de nós.

http://www.rtpa.es/sociedad:Algamar-Producciones-propone-que-los-musicos-controlen-totalmente-el-producto-de-su-trabajo_111322913728.html

FICX

2011-11-24T01:40:00.004+01:00

Siempre ye lo mesmo. Siempre m'entren ganes de poneme a rodar... a poneme a acabar d'escribir eses coses que tengo tiraes per dalguna carpeta perdida dientro d'ún discu duru localizau.

Y dempués de ver dalgunes coses de les del festival d'esti añu... entrenme más ganes. Sicasí, tengo nidio que nun quiero volver a facer dengún proyeutu a les carreres, nin quiero intentar facer nada d'Azcona. Ye'l momentu d'ir sele...

D'aquella

2011-11-16T23:41:00.005+01:00

D'aquella esguilaba pela muria que hai na parte d'atrás de casa. Enxamás daba vuelta al pueblu pa entrar pela portilluca de fierro negro. Yera meyor metese pente los praos, al llau del tresformaor de lluz, echar una carreruca y d’ún saltu pasar al otru llau…

El Val.ledor l.lora

2011-10-25T23:49:00.004+02:00

D’aquella, nos primeros díes del añu 2009, esfrutábamos coles sorrises de los qu’esti día quedaron ensin elles.

D’aquella, nos primeros díes del añu 2009, les nueses miráes perdíense nes maravilles qu’atopamos en El Val.ledor, nes inmenses belleces de la ñatura, na borrina contínua, nos güeyos de la xente que nos daba les gracies por volver a lleva-yos lo suyo.

D’aquella, nos primeros díes del añu 2009, l’arume de Fonteta yera l’arume de la vida, yera l’arume de tranquilidá, de les coses seles, de les templances… yera l’arume de lo más nueso.

D’aquella, nos primeros díes del añu 2009, vivimos.

Esti día quemáronnos tolo qu’ellí tuvimos.

El fríu

2011-10-23T23:17:00.003+02:00

El fríu ,nun camín ensin pauses, espoxigó espardiéndose pasín ente pasu, carcomiendo tolos muérganos sensoriales qu’atopába al so pasu.

Asina, fueron desapaeciendo tolos rastros de vida, toles pequeñes muestres de recuerdos, tolos sentimientos acumulaos dende que conociera.

D’esti cáncanu namás sobrevivió’l sentimiento d’ausencia que n’esta dexeneración del ser, venía acompañau d’úna sensación de conxelación que-y percorría tol espinazu. […]

El canciu les mentires

2011-10-11T13:48:00.000+02:00

Y vaya cómo presten estes coses

Yo maté a Manolete

2011-10-10T00:17:00.000+02:00

Confesiones de los profesores de la enseñanza pública.

Tamos perdíos, compañeros y compañeres de la enseñanza pública, afayáronnos, van llevantanos el chiringu, van privatizanos pa que sepamos lo que ye bonu, acabósenos el choyu, sálvese quien pueda. Siamos, pos, valientes y reconozamos d'una vegada toles nueses traiciones, confesemos les nueses perfidies y vilezas como pide la lexón de tertulianos, columnistes y pintorescos bonales collaboradores na campaña antienseñanza pública.

Los profesores de la enseñanza pública, y yo’l primeru, somos, por casu, culpables de que dellos alumnos nos lléguen a clase ensin almorzar ya ensin asease, ayunaos y puercos, pos, si cumpliéramos cola nuesa obligación, madrugaríamos más y diríamos a les cases de cada rapaz pa desaniciar que la so ma tea dormida y que’l pá nun volviera de quién sabe ónde.
Los maestros de la enseñanza pública, y yo el primeru, somos culpables de que suspendan y estrocen asina les estadístiques los alumnos búlgaros, chinos, rumanos... qu'apaecen pol aula a mediu cursu ensin saber nin una migayina d'español y a los qu'hai qu'escolarizar, pos la enseñanza concertada y la privada tán a tope, nun quepe nin una anfiler, oyes. ¿Quién nos manda nun tener a puntu un métodu pol qu'apriendan español en dos hores y cultura española en trés? ¿Por qué nun faemos hores extres vespertines con ciertes minoríes qu'alleguen a les nueses aules (pos la enseñanza concertada y la privada tán a tope, etcétera) desmotivadas, agresives, boicotiando tou lo que pueden?

Los profesores de la enseñanza pública, y yo el primeru, somos culpables de que dellos alumnos nos vengan col historial d'afrellar a los sos padres de palabra y obra, de qu'ignoren pallabres como «respetu», «llendes» o «autoridá». Somos nós, desengañémonos, quien fomentamos y afalamos la programación de les Telecinco televisives, quien proponemos como modelos pa la mocedá a prostitutes terminales, folgazanes y maleantes, caradures y sinvergüences.
Los profesores de la enseñanza pública, y yo’l primeru, vemos con bien bonos güeyos la tolerancia escontra l'alcohol y demás drogues que tantu bien faen a los mercaos, encamentamos que los “botellones” sían más multitudinarios. Nun son los padres, nun ye la sociedá: nós creamos los videoxuegos violentos y vender peruquier, nós inventamos les páxines más podrientes d'internet y amosamosles a los alumnos o nun xixilamos cuando les visiten.

Los profesores de la enseñanza pública, y yo’l primeru, falamos fatal, dicimos: «¿Esa tema que ustez esceciona en base a qué lo implementa?»: nun falamos como los políticos, como la clase dirixente, como los banqueros. Creemos que por sacar una oposición yá nun tenemos qu'allegar a les cases de los alumnos a lleer con ellos, a comentar con ellos les noticies del periódicu, a escuchar xuntos la radio, pos cargamos a los padres con unes responsabilidaes que nun pueden asumir, máxime si tán na cárcel o sumíos, como puede asoceder con alumnos que lleguen a la enseñanza pública (pos la enseñanza concertada y la privada tán a tope, etcétera).

Los profesores de la enseñanza pública, y yo’l primeru, promovimos y redactmos esos currículos taráos y vergonzosos qu'enseñen lo que nun importa, que tasquen onde nun pica, que fomenten l'analfabetismu funcional: ye falsu que los auspiciara l'astuta clase dirixente pa fabricar carne de cañón currante amongolada.
Los profesores de la enseñanza pública, y yo’l primeru, somos una banda de apoltronaos y folgazanes, que nun damos palu a l'agua, de baxa toles selmanes y que perdemos el tiempu en llabores de psicólogu, enfermeru, hixienista, asesor personal, mediador... ensin esplicar como deberíamos el sistema fonolóxicu del español.

Mientres el restu de conciudadanos trabaya que les pulga y nun se da un respiru (basta mirar alredor pa comprobalo), nós atropamos los escedentes de los nuesos sueldazos, les demasíes de les fortunes que cobramos como docentes de la enseñanza pública (esto ye, por non faer nada) pa unvialos a les nueses cuentes en negru nes Isles Caimán. Que se sepa: nos paraísos fiscales namái ingresen pasta los profesores de la enseñanza pública. Y ye que fadríen bien en gaseanos, en clavanos anfileres ente uña y carne, compañeros y compañeres. Porque, digámoslo yá, fuimos los profesores de la enseñanza pública, y yo’l primeru, quien matamos a Manolete, na plaza de toros de Llinares, el 28 d'agostu de 1947, a les cinco de la tarde, a les cinco en puntu de la tarde.

Francisco Martínez Pena en La Nueva España del 05 d'Ochobre de 2011

Pedregal ya La Pereda

2011-10-07T20:55:00.003+02:00

Les escueles de La Pereda y El Pedregal tan nunos edificiucos avieyaos, sicasí les aules nun tan mal.
Los neños y les neñes d’El Pedregal y La Pereda tienen perros, pitas, cabres, gatos, xatos, y vaques… munches vaques y lo que más-yos presta ye montar en bicicleta y atar a los xatos.

Les ruedes del coche van enllenandose pasín ente pasu de cucho. Primer selmana acabada.

Tuña

2011-10-04T10:31:00.004+02:00

Tuña ta n’obres. Tan anovando’l sistema de saneamientu. Pegaes a les ventanes grandes de la escuelina primera, les máquines faen furacos y meten ruíu. Los rapacinos dicen que van facer que la escuelina tenga qu’esnalar pa nun caer.

Na escuela de los mayores, el ruíu ye menos y permítenos falar de caíes y operaciones, amás de pites, ponis, gatos y perros.

43º 20' N 6º 25' O

2011-09-30T00:38:00.003+02:00

Y n’esto qu’esti vienres mándenme dir a firmar un contratu pa dar clases d’asturianu. Y n’esto qu’el llunes entamo a andar peles escuelines del conceyu de Tineu, les que tan nel CRA Eugenia Astur. Y n’esto que siento una emoción que llena los mios güeyos de rabia. Y n’esto que siento un pequeño alloríu, y miueu, muncho mieu y respetu.

Y n’esto que llegara’l llunes.

Y blinco.

Los resultaos supondríen que ye posible viaxar nel tiempo

2011-09-24T01:30:00.003+02:00

El CERN afaya unes partícules que superen la velocidá de la lluz y ponen en tela de xuiciu la Teoría de la Relatividá

Los neutrinos algamen una velocidá superior a la de la lluz, según les primeres resultancies avanzaes esti vienres en París de la esperiencia internacional OPERA dempués d'unes pruebes realizaes nel llaboratoriu de física CERN.

Asina lo adelantró'l Centru Francés d'Investigaciones Científiques (CNRS), que da cuenta de la prueba llevada acabo dende les instalaciones del CERN en Xinebra, col llanzamientu de neutrinos, partícules subatómiques, disparaes pa contra un llaboratoriu italianu a 730 kilómetros de distancia.

Según el profesor de física de partícules na Universidá británica de Manchester, Jeff Forshaw, en declaraciones a Reuters, de confirmase, les resultancies supondríen qu'en teoría ye posible "unviar información al pasáu".

"N'otres palabres, viaxar nel tiempu sería posible (...) (sicasí) eso nun significa que vaigamos construyir máquines del tiempu al curtiu plazu", indicó.

El centru galu califica el resultao colos neutrinos de "sorprendente" anque titula'l so comunicáu, a la espera de la presentación oficial de les resultancies na ciudá suiza, ente interrogantes: "¿más rápidu que la lluz?". Los neutrinos llegaron al so destín, en Gran Sasso, 60 nanosegundos más rápidos que la lluz, que cubre esa distancia en 2,4 milisegundos, esplicó Dario Autiero, director del equipu ya investigador nel CNRS.
"Punximos en marcha un dispositivu ente'l CERN (Centru Européu d'Investigación Nuclear) y el Gran Sasso que nos dexó una sincronización a nivel de nanosegundos y midimos la distancia ente los dos sitios con (una precisión de) veinte centímetros", esplicó Autiero nun comunicáu del CNRS.

"Estes midíes presenten escases duldes y una estadística tal que concedemos una gran credibilidá a les nueses resultancies", estimó. Más d'un sieglu dempués de qu'Albert Einstein enunciara la teoría de la relatividá, en 1905, "la esperiencia OPERA da testimoniu d'un resultau totalmente inesperáu :los neutrinos lleguen a Gran Sasso con una ventaya pequena, pero significativa, con relación de la que la lluz precisara pa cubrir el mesmu percorríu nel vacíu". Los resultaos básense sobre la observación de más de 15.000 neutrinos, precisó la institución francesa.

Hasta agora, la velocidá de la lluz foi considerada como una llende infranquiable y si nun fuera asina, "podría abrir perspectives teóriques dafechu nueves", amestó'l CNRS. Anque, a pesar d'estes afirmaciones envalora que van faer falta "midíes independientes por que el efectu reparáu pueda ser refutado o formalmente confirmáu".

Esa ye la razón pola cual el investigadores del programa OPERA decidieron abrir la resultancia de les pruebes "a un exame más ampliu per parte de la comunidá de físicos". El CERN tien previstu presentar los resultaos de les pruebes nun seminariu especializáu que va empezar a les 14.00 hores GMT metanes una gran espectación, dempués de que dende ayeri circularen delles versiones alrodiu de les resultancies del estudiu.

Consiguir superar la velocidá lluz

El CERN aportunó'l xueves en que nada yera oficial nin concluyente. Nel llaboratoriu de física más grande del mundu trabayar dende va años pa tratar de pescudar si ye posible rexistrar velocidaes superiores a la de la lluz -299.792 kilómetru per segundu-, lo que va en contra d'una pilastra teórica de la física. Les resultancies de los exames que se realicen son presentaos al restu de la comunidá científica, principalmente a llaboratorios similares n'EEXX y Xapón, pa confirmales

[Diáriu Público http://www.publico.es/ciencias/397923/los-resultados-supondrian-que-es-posible-viajar-en-el-tiempo]

nun facer nada en díes impares

2011-09-21T15:58:00.003+02:00

atalantar: v. Pensar, emplegar la mente [pa facer xuicios, pa solucionar un problema]. Dempués de muncho atalantar, dio cola solución. 2 Acertar, llograr [un bon resultáu]. Esi nun atalanta una. 3 Alvertise, ocurrise [daqué a daquién]. Nun se-y atalantó qué dicir. 4 prnl. Antoxase, dar gana, deséu. Atalantóse-y marchar de casa. 5 prnl. Arreglase, amañase. Nun se-y atalanta nada.

Nota mental: nun facer planes mentales en díes impares de meses impares d'años impares

Rodaxe

2011-09-16T13:34:00.003+02:00

Va tiempu que nun taba nun rodaxe con más xente. Les últimes coses automatizábales faciendoles yo solu, cámara en mano, ordenador en mesa y tira que llibres…
Nun ye que nun me preste andar per ehí grabando cosuques yo solu, pero ye diferente, los rodaxes n’equipu presten más.

Tuve esta selmana, dempués de percorrer Vigo, a cuentos de Pablo Texón, y Santiago a cuentos mios y de la música de The Specials, nel rodaxe de “Humo”.
“Humo” ye un curtiu nel que me dexé engañar pa facer de “guah.e pa too”, dende llevar un Niva de Xixón a Rueda (los asientos del Niva nun trespiren), a llevar una furgo de Rueda a Xixón, a colocar lluces, a facer de segundu operador… y con un equipín piquiñucu, sicasí mui grande.

Ya nun sabía qué yera eso de andar dende les 9 la mañana hasta les 7 de l’alborada del día siguiente colos trastos d’un llau pa otru… , ya nun m’alcordaba de lo que yeren 4 díes d’empatizar con actores que nun pueden andar pela cai sin que los pare la xente (Cesáreo Estébanez, Rosa María Mateo...), con actores de casa que son de lo más grande y que pasen más desapercibidos.
Y montar fogueres, y tolo que vien al rodiu de too

Y prestó.

El branu morrió dempués d’una nueche de cuartu de lluna

2011-09-09T09:41:00.004+02:00

Esi día de sol, dempués d’un bañu fugaz saltando y garrando les foles masificaes de Xibares, xubí a El Cabu Peñes col envís de ver uno de los atapeceres más guapos y espresivos que conociere.

Los díes de branu ye lo que tienen, xente. Y nun diba ser menos aquel sitiu. Lo mesmo que nes playes de la fastera, equí apilábense los coches a la oriella la carreteruca que va dende Viodo al chigre qua ta plantau a los mesmos pies de Peñes.
Xente pasiando, pareyes, families, d’equí, d’alló, d’acuyá… Un neñu berrando al altu la lleva porque se-y escapara de les manes el globu de Bob Esponxa que, pa mi idega, diba volver al fondu de la mar con Calamardo.

Garré la botella d’agua rellenada que tinía nel suelu’l coche, merqué un paquete pipes nel chigrón y fui andando un cachín más p’allá, acercándome al sol y dexando un pocoñín más lloñe a tola xente…

Atopé un sitiu afayaizu, senteme enriba la toballa y esperé. Yeren les ocho y media la tarde d’un domingu de finales d’agostu.

Y n’esto, en llugar d’atapecer, entamó a amanecer, y a les nueve y media la nueche, yá alboreciera. De secute, sin esperar a la sesión vermú de medianueche, atapeció y volvió amanecer.

Un paisanu que taba pescando ballenes dende lo alto’l cantil echó a volar, llegó a la mar y cola so boca de picu arrampló con una Xarda de fuera de temporada.
Pola bulla que metíen dame la impresión que la xente taba ablucao col lapsus de tiempu y l’espaciu. Nun esperaron al tercer amanecerín pa cuerrer pal coche y arrancar ensin sentiu pa casa.

N’esto apaeció la lluna, en forma de cuartu menguante. La borrina apaeció a los diez minutinos, lo mesmo que otra alborada.

L’atapecerín dende’l Peñes sí que ye guapo. Y l’estramoniu ayuda.

Publicau nel selmanariu Les Noticies del 09.09.2011

Naufraxu

2011-08-30T22:39:00.004+02:00

Nel mes de mayu de 2008, abrimos el flog “Cosesdelamar”. Cosesdelamar yera un paseu pola vida, un paseu pelos sablones y los díes d’aire puru, una manera bien guapa de dexar muezques de los díes en positivu, y una manera de descubrir toles coses que pudieren ser base d’un cuentín con final feliz.

Güei, pasiando pel sablón de la playa de Xagó, guetando dalgo d’esi aire eternu, atopeme colos recuerdos d’ún diecisesi de mayu del añu 2008. Esi día, n’esa dómina, retratamos una muñecuca de güeyos azules y espresión asustadiza. Non, agora que lo miro nun ye la mesma, pero n’esi intre, el mio corazón bombió sangre de zucre pente los restos del naufraxu

A vueltes con El Rifa

2011-08-27T13:19:00.004+02:00

El Rifa llámase en verdá Xulio García Zapico, y ye de Tiñana. Ye un paisanín non mui altu, un poco grandón de tripa, con un pelo canoso que dexa entrever, na metá de la tiesta, el pelleyu propiu del pasu de los años. Enriba la boca un bigotín cuidau, blancu como él solu, que talmente paez que brilla.

Gánase la vida yendo de pueblu en pueblu nos díes de romería, tocando unes piezuques de repertóriu caribeñu al són del so curdión de marfil. Amás el nomatu de El Rifa nun vién solu. Ye l’encargáu d’animar les rifes de les papeletes del xamón o del paxu de navidá. El día la Virxen tolos pueblinos de la cortorna mátense por tenelu pa la puya’l rámu.

El Rifa ye un profesional del ilusionismu numbéricu. Nun hai nesti mundiu naide capaz de vender tántes rifes y d’ amañar tantos concursos como él. Los de les comisiones de fiestes sábenlo, saben que fae trampes, porque nun ye normal ganar güei un llacón en Caborana y mañana dir a Cualloto y marchar col quesu, dempués de que-y tocara l’otru martes la caxa sidra na Foz. Sicasí nun son quién a saber cómo lo fai, El Rifa ye mui finu pa eso.

A mediaos d’ochobre, toca dir camín de Cenera.

El Rifa madruga pa preparase y garrar la llinia de la Empresa Fernández. Dexa l’agua caleciendo nun cazu vieyu mientres s’afeita cola maquinilla llétrica que mercara va años na “Droguería Asturias” de Xixón.

Una cuyarada de Molico espera nuna taza de cristal amarronáu a que El Rifa eche l’agua ferviendo. Dempués va entemecelo con dos cuyarades d'Eco y una pastilluca de sacarina.
El Rifa, yá col pelu enllenu brillantina, garra la tazuca y un paquete de cinco galletes María que tien guardao de cuando tuvo nel hospital la última vez. Siéntase na mesa la cocina y prende la radio pa sintir el parte de les nueve la mañana.

El Rifa apaéz pela carpa col so sombreru blancu a xuegu cola so chaquetuca de cruzar. Sube pa enriba l’escenariu y pon el curdión nel so regazu pa facelu sonar. Embaxu, una pareya bailla un valseao.

[Publicau nel selmanariu Les Noticies del 26.08.2011]

Pente escayos

2011-08-20T00:12:00.005+02:00

Los bardiales crecen y tapen les muezques que dexáramos a la vera la mar.

Revolviendo pente los escayos y los felechos entá s’acolubren lletres que’l salitre y los díes nun fueron quien a borrar.

viñeta

2011-08-06T17:14:00.003+02:00

Y n'esto, zarró’l cuentu y él quedó atrapau dientro, nuna última viñeta en blanco

03.08.09

2011-08-03T13:02:00.005+02:00

y les nueches d'estrelles dexaron d'allumar requexos de la mar

Tres condiciones

2011-07-31T16:52:00.003+02:00

Llegamos nún de los masificaos tresportes qu'acondicionaren pa mover a los visitantes. Baxamos ente emburriones. Dos muyeres mayores, al tratar deblincar dende la plataforma, tuvieron a un tris de ser triaes pola menada.

Zarraos ente les muries metáliques avanzamos enfusándonos na balasma de xente que s'atracaba bloquiando la entrada y salida. Les primeres casetes, les úniques que podríen ser d’interés naquel llugar, acabáronse primero que pudiera moveme al llateral onde s'atopaben. La masa enfervorecida namás me dexa dir nuna dirección.

Empezó, nesi intre, l'ataque atronador de ruios entemecíos de los altavoces semaos a lo llargo d’aquel espaciu llendáu por zarros. Sabía qu'a partir d'esi precisu momentu, nun nos diben abandonar en tol tiempu que nos tuvieren ellí.

El túnel que lleva a ca ún de los submundos vuélvese escuru de contino, y los vapores pueden apaecer dende cualesquier ínfimu microespaciu. La pestilencia apodérase del ambiente, y a midida qu’ avanzamos ente emburriones, les lluces ceguñoses empiecen a ceganos.

Nuna de les salíes d'emerxencia apaez ante nós un pasadizo que percuerre les construcciones llevándonos aun espaciu arrodiáu d'imposibles soníos graves que bombardéen les coraes de los qu'intenten alendar otros aires.

L’acuto trampiáu dura demasiáo poco, y aína suenen les alarmes y vuelven les lluces
cegadores, los soníos atronadores y los vapores fededores.

Apuntes n'impar (ii)

2011-07-28T00:58:00.005+02:00

Estos díes n’impar, cuando ando a la solana pente les peñes, a la vera’l salitre, apetécenme zreces.
Nunca nun m’alcuerdo de meteles nuna bolsuca pa comeles a l’oriella de la mar. Quiciabes nunca nun m’alcuerde de meter un cachin tortiella tamién.
La cosa ye que pasen les hores, mirando pa una boya colorada que flota xugando coles foles. Va más de diez años que nun diba a echar hores así.

Quiciabes en 10 años seya quién a consiguir meter les zreces

Prau Gervasia

2011-07-22T13:48:00.004+02:00

L’otru día, dempués del emotivu conciertu de N’Arba nel festival “Tolo d’Asturies” de La Felguera, Ambás y yo facíemos alcordanza d’aquelles romeríes del Prau Gervasia de Candás.

Aquelles nueches celtes entamaes pol Ensame Xuvenil Trisquel yeren cita indispensable del branu. Lo mesmo taba orbayando, lo mesmo lloviendo d’esto que nun abocana, lo mesmo yera una nueche d’estrelles y lluna clara... Dábanos igual, ellí tábemos, plantaos a pie d’ escenariu.

Saltaben Lliberdón a escena y yá taben los primeros glayíos y los primeros blincos pente’l prau. ¿Quiés un piso? ¿Un Xalé? ¿Un pixín? ¡Tiéneslo!

Mentanto, na barra, pegábense poles caxes de sidra y los bocadillos de quesu con llombu, recargando fuercies pa les hores de vida que taben por llegar.

N’Arba yera’l puntu fuerte d’esa nueche, d’eses nueches. Dempués del silenciosu respetu col que sintíamos “La danza Salcéu”, alloriábamos “de Grau a Concarneau” con “El cura ta malu”. Auténtiques ayalgues nunes hores máxiques, que nun veíen final hasta l’alborecer, dende’l feu ocalital que protexía la capilla San Antonio d’estos mozos y moces qu’esfrutaben del soníu de los raigaños del país.

Güerku y Os Papaqueixos marcaron a fueu ún d’esos tiempos nel prau. Dempués de dicir “Non a la depuradora”, l’escenariu enllenose de xente glayando al ritmu del “Teknotraficante [farloppo ma non troppo]”, mientres l’aire, que se tornara en fariña, envolvíanos a toos nun éxtasis vital qu’ anguañu sigue na memoria colectiva de los que lo vivimos.

Les nueches celtes del Prau Gervasia acabaron, lo mesmo que N’Arba y Güerku.

Sicasí, esti añu fuimos quien a, per un instante, volver a situanos n'aquella dómina de branos de sorrises amplies.

[Publicau nel selmanariu Les Noticies con fecha 22/07/2011]

El principiu del fin

2011-07-22T11:52:00.004+02:00

Nun ye qu’un 7'9754 seya la panacea de les notes d'una oposición, pero toi contentu.
Un 7’9754 n’otru añu impar, con un cursu d’adautación a grau y con un proyeutu bien guapu de Xentiquina per mediu.
Espero qu'esto pueda ser el principiu del fin, y como diz Zahara, que seya una mudanza bien fecha

Gracies, a ti, siempre

Apuntes n'impar (i)

2011-07-18T21:34:00.005+02:00

En Belmonte, el suelu yeren castañes que s’afanaben por pinchanos en toles posiciones. Atravesaben, ensin piedá, coles sos alfileres la toballa. Dempués llego l'abrazu, antes de durmir ente los rayinos del sol que buscaben el so sitiu pente les fueyes del techu. La felicidá y el cielu podíen apalpase sin falta de más nada.

suaños

2011-07-16T20:28:00.003+02:00

Una vez suañé dende los tos güeyos

Ven

2011-07-13T16:53:00.003+02:00

Dacuando

2011-07-12T16:22:00.006+02:00

Dacuando, atapecíen les tardes pente la sablera.
Dacuando abocanaben les lluvies
de los años impares.
Dacuando.
Dacuando olvidaste’l llantu
pente los regueros de les mios manes,
dacuando volíste a ser una sorrisa
pente les nueches de lluna inmensa.
Dacuando volvisti a querete sintir
dacuando.
Dacuando yeres tu.
Davezu escaeces dacuando.
Dacuando escaeceste a ti
Davezu escaeceslo tanto[…]

D'homenaxes y romeríes

2011-07-08T20:11:00.005+02:00

19.31h ¿Val la prueba? – Sergio da l'Ok dende la mesa soníu – Gracies, tol mundu fuera del escenariu, vamos abrir puertes.
Va diez minutos la cola pa entrar al Auditoriu d’Uviéu entamaba a dar vuelta pela esquina y llegaba a la ilesia. Los encargaos de la entrada llevaben tres o cuatro hores alloriaos de tantu traxín que traiemos.

-¿Van toos pa lo de Xentiquina?-Una pareya, al fondo llevanten el brazu, ablucaos…. – Non, nós vamos a… - nun-yos da tiempu a acabar la frase – Val, pues tienen qu’entrar pela otra puerta…

19.40h La sala grande del auditoriu entama llenase enforma. De camín a la cabina proyecición atópome con mio má que me para pa cuntame nun se qué coses de que si hai muncha xente y de que si merendé, de que si… y yo con prises y con calor. Y l’ascensor que tarda…

20.05h Y como siempres, les autoridades lleguen tarde… y too entama tarde y yá tamos fuera de tiempu enantes de presentar a Aida Castañón y a Naciu Varillas. Entamamos con un pelín d’estrés colectivu ente Remis, Eddie y yo…

21.30h -Los Berrones.. ¿ONDE TAN LOS BERRONES??
21.41h –Yá apaecieron Los Berrones – Pues preparaos que yá entren.
22.20h El coche’l maestu tien más años yá que la campanona de la catedral… Skama zarra l’actu
23.30h Tierrastur de Cualloto. Tará salúdame dende los fogones – Home,a la fín llegasteis…vamos dir sacando la comida…- y yo pensando nun culete, y pensando que quiciabes Esther, que llegó un pocoñín enantes, cumpliera la so promesa y acabare cola barrica…

Y yo mirando’l reló, lo mesmo que Silvia y Paula, y pensando en madrugar pa lleer un esame d’oposición… y pensando n’otru culete , y nun acaben de sacar… ah!, sí, pera, ehí tan los tortos con picadillu y.. redios! Qué de xente!, ¿déxesme pasar?¿Llegaron les casadielles?¿Un chupitín? Echame un culete anda.Prestome muncho. ¿Quies chorizu?.¿Onde ta’l mio tenedor?. Un culete pol amor de diós!

Y n’esto suena’l despertador y son les siete y media la mañana y… y qué guapo ye cuando te llamen a les ocho pa comentate’l restu la nueche…pero eso ye otra romería…

[Publicau nel semanariu Les Noticies el 08.07.2011]

Toñín

2011-07-04T23:48:00.003+02:00

En Carrió yeramos 5. Toñín venía dalgúna fin de selmana dende La Corredoria. Nun yera la bicicleta la so pasión fundamental, yera más bien el futbol. En Carrió casi nunca xugabemos al futbol. Namás cuando venía Toñín.
Armábamos unes porteríes coles chaquetes, onde’l patiu la ilésia, y dabemos-y cuatro pataes, mal daes, al balón que taba siempres nel desván de Casa Falina. Él yera el que meyor xugába.
Nunca nadie entendió cómo un mozu que naciera en Xixón fuera tan fanáticu del Uviéu… bueno, tampoco entendíen como yo, que ñaciera na capital, yera más del Xixón.
En Carrió fuimos siempres más de baloncesto, pero a él nun-y prestaba muncho xugar de base.
Xugábemos al Risk, y fue’l primeru en enseñanos una consola que nun fuera de xugar al tenis con cuatro rayes.
Carlinos yera’l güelu de Toñín y siempres taba trabayando na güertuca pindia que teníen a la vera casa. Nun se cuantos carretaos de fabes sacaben d’aquella tierruca, pero el recuerdu más nítidu que tengo ye esi, el de Carlinos atendiendo pales fabes. Falina siempre pela caleya ofreciéndonos un vasu d’agua.
Esta tarde Toñín díxome que pa primeros d’año dibemos tener que mercar una pelotina pa xugar col so fiu. Y yo saqué la mio mayor sorrisa.

Aurrevoir

2011-07-02T11:55:00.004+02:00

Marchó Xentiquina, marchó Seliquín.
Esti xueves, más de mil persones tuvimos homenaxeandolos nel Auditriu d'Uviéu.
Hasta la cabina d’arriba, llegaron les llárimes emocionaes d’un Nacho Fonseca que merez eso y muncho más.
Pola mio parte, muncho qu’agradecer a Jose Luis Remis, que punxo tola pasión pa que saliere p’alantre, y con coherencia, esti actu que va quedar nes retines de la memoria de tolos que lo esfrutamos.
Y a la familia Fonseca, cómo non, les gracies eternes por dexame entrar nes sos hestories de vida.

Xentiquina y Seliquín, Seliquín y Xentiquina queden agora nel recuerdu, y los testimonios de los que vieron como medraben queden nel documental qu’asoleyo xunto colos discos homenaxes.
Seliquín- Xentiquina. Una ferramienta pedagóxica al serviciu de la escuela n’Asturies.
Esti sí que tamién merez la pena.

Ayer tuve otra vez en El Servilletero

2011-06-29T23:42:00.000+02:00

Quemando

2011-06-23T15:57:00.002+02:00

Les fogueres d’antaño yeren en Carrió ya en tola redolada un espectáculo de lluz y fumu.
Anguañu malpenes queden media docena de cases onde quemar les vieyeres y anovar les promeses y buenes nueves d’un branu que ta acabante d’entrar.
N’otru añu impar .

10 minutos

2011-06-20T13:33:00.003+02:00

Nun se por qué pero tengo la zuna de llegar siempres tarde. […]
De primeres foi llegar 10 minutos tarde.
Llegaba a les mios cites siempres 10 minutos tarde. Nun m'alcuerdo cuando entamó too pero, sí se que nunca enxamás pasé peles estaciones entemedies, pelos apeaderos de 3, 6 o 9 minutos.
10 minutos de reló.
Eso foi hasta que me dio por comentar aquello de "voi llegar 10 minutos tarde", más que ná por nun quedar mal. Y claro, llegaba 10 minutos tarde. Asina que si quedara a los siete de la tarde, avisaba que diba llegar a y 10, pos a los siete y venti esactamente entraba pela puerta.
[...]
La cosa yera preocupante, pero llevábase bien. Lo peor ye camentar que n’ocasiones, nun son 10 minutos, son 5 años y 10 minutos.
[...]

Mientres

2011-06-16T15:53:00.002+02:00

Mientres, espero. Afuracando pente les hores, buscando dalgún resquiciu per onde fuxir y esfrutar d’una tranquilidá antroxada d’escaezu que nun conocía.
En malpenes diez díes tornarán los momentos de les pruebes de los años impares. Naguo por qu’esta vegada nun resulte feríu de muerte.

Xentiquina (+1)

2011-06-11T01:26:00.004+02:00

Pente foles de salitre salí a buscar un puñadín d’hestories, pa cuntar cómo se faen les canciones que faen apaecer les sorrises nes cares de los neños.
Pente mares d’ocle siguí empapándome del oxidu del salitre.

Toponimia

2011-06-09T16:13:00.004+02:00

Esta tarde falaremos de xente, y de cómo facer pa que nun-yos silencien

el cielu que fuisti

2011-05-30T17:13:00.003+02:00

[...] Tamién tan los cielos terrenales, los cielos qu’endulcen les selmanes, los cielos que vienen col aire ‘l sur, los cielos que desapaecen ente les penasques de la rutina, los cielos que acolumbramos dende les foles calmes de les cales de l’oriente. El cielu pasaxeru, el cielu pente les ventanes d’un tren, el cielu d’orpín, el cielu inventau, los cielos de cuentu, el cielu estrellau, el cielu oxidau, el cielu de salitre, el cielu que fuisti ya’l cielu que das.

Nunca enxamas...tal vez

2011-05-22T16:45:00.001+02:00

Xentiquina Crew! (+1)

2011-05-12T01:16:00.000+02:00

Entamamos a rodar un cuentín pa la Xentiquina Crew (tea onde tea)
-----------------

Yera la princesa d’un país que nun cuentu esistió
y una mañana d’abríl namorose con un pastor.
Yeren mui felices cuando’l rei
namás que s’enteró
mandó encerrar al mozu nun escuru cuartón.

Y cuenta la xente que d’amor el pastor maló
Sentadín nel xardín
Amustiabase la flor
¿Pero tolos cuentos finen bien?
¿Ye esti la esceición?

El rei nun morrió na guerra y l’asuntu así quedó.

Yá nun llinda cabres el mocín
Cambió de profesión
Güei pasea pel xardin nun caballu de cartón
Yera la princesa d’otru país ,y un caballu cartón, y un pastor que ye príncipe
Y el cuentu s’acabó

Coses de nueso

2011-05-04T10:35:00.001+02:00

Diseñando coses de lo nueso

Play-movilizando

2011-05-02T23:25:00.001+02:00

Ente l'ocle

2011-04-24T15:47:00.002+02:00

Fuera orbaya y el salitre sigue oxidandose
nes primaveres d'abril

Somo(s)

2011-04-21T23:25:00.003+02:00

[...]Les playes, los xuegos, les coses de la mar...[...]

Silvia Abascal

2011-04-14T01:21:00.002+02:00

Píldores d'abriles

2011-04-05T11:00:00.004+02:00

Va un añu yera llunes y yo nun desayunara un cachín de sandía y una taza de té.
Na feria vendíen manzanes caramelizaes y ella mordiera una.
Na boca quedo-y el dulzor pa una temporada.
Los llabios manaben tanto zúcre qu’atrapaben los besos que s’averaben a la so sorrisa.
Va un añu el día nun empezara de martes.

Nel Amaro

2011-04-04T21:14:00.000+02:00

y Nel y les sos coses déxennos un 4 d'abril

XXIII Conciertu pola Oficialidá

2011-03-30T16:19:00.002+02:00

Y esti añu pidieronme diseñar el cartel.... y dempués de mil cambios de color... quedó así.

guiando

2011-03-21T16:28:00.003+01:00

[...]Les hores pasaren pasín ente pasu caleyando hasta la cai Vicaria, onde una sardinera amenaza con ecaha-y un cubu d’agua a un faltosu que nun sabe más que molestar a la xente.
Dempués de cinco tomes, sal la buena y acabamos.
Pasiamos de camín al barriu. Paramos a tomar una botellina a les hores nes que la xente yá retira. Llueu dispidimonos y nagüamos por más.
A la mañana apaez el sol y déxanos requexos de calor na entrada de la primavera. Espertamos con ganes y colos suaños nun acabaos de la nueche anterior.
Suenen los ritmos acompasaos d’una canción de la Nouvelle Vague mientres el coche guía’l camín.
[…]

El Servilletro

2011-03-18T10:45:00.004+01:00

L'otru martes Alfredo González invitóme al so programa de Radio Uxo ,El Servilletero.
Falamos de cine y de música.
Tracamundié películes, en llugar de falar de Truffatut falé de Torrente4, y dexóme poner la canción de cierre.

Ir a descargar

Mientres

2011-03-17T02:18:00.005+01:00

Mientres en Fukushima les radiaciones algamen niveles mortales, equí algamamos conciencies de presente, pasau ya futuru.
Mientres en Bengasi les lluvies de bombes alcancen les resistencies, equi pasiamos pente l'orabayu del Altu Ayer sitiendo caer les barreres de lo ayeno.
Mientres, Asturies enllénase de nuevos salvadores de lo nueso y vieyos pirates de siempre.

Bipolarizando llugares

2011-03-09T15:20:00.002+01:00

Siempre pasó. Pero esta selmana a mí vuelve apeteceme tar en dos, en tres y hasta en cuatro sitios a la vez. Quiero nun perdeme les coses que pasen nos sitios, nes xentes. Nunca nun fui quién a bipolarizame nel espaciu y nel tiempo, y esta selmana tampoco.
Quiero blincar un vienres y sentame a la vez, quiero sentir les cuerdes d’una guitarra afinada y antroxame de quien quisiere ser. Quisiere ser buenu y malu a la vez. Quisiere poder.

Brillantina

2011-03-04T01:19:00.007+01:00

[...]
El Rifa madruga pa preparase a tiempu de garrar el primer Arrojo . Dexa l’agua caleciendo nun cazu vieyu mientres s’afeita cola maquinilla llétrica que mercara va años en Xixón, na droguería Asturias.

Una cuyarada de Molico espera nuna taza de cristal amarronáu a que'l Rifa eche l’agua ferviendo. Dempués entemezlo con dos cuyarades d'Eko y una pastiella de sacarina.

El Rifa, yá col pelo perfeutamente peinao, y enlleno brillantina, garra la tazuca ya un paquete de cuatro galletes María, de los que tien guardaos de cuando tuvo ingresau nel hospital la última de les veces.
Siéntase na mesa la cocina y prende la radio pa sintir el parte de les siete la mañana.
[...]

Con opos, sin tiempu. Con proyeutos prestosos

2011-02-24T20:27:00.004+01:00

Val, van convocar oposicones. Acabaronse les meriendes de los sábados y los vermús de los domingos. Apaecieron dos proyeutos en cuenta d'ún. Y presta. Nun se d'ú voi sacar tiempu, pero apetezme facer los dos.
Sí, audiovisuales.

(sí, tengo más coses pendientes...lo mesmo de siempre...)

Sin opos, con tiempu

2011-02-15T14:26:00.003+01:00

De les poques coses buenes que tien nun tener oposiciones ye que puedes facer otros planes.
L’otru día, cuando taba preparando les coses pa llevar pa Cangas a lo de la proyeición de curtíos, entráronme les ganes de volver a estresame nun rodaxe grande.

Apetezme volver al equipu d’Aida, a cuntar con xente abondo como pa fabricar suaños curiosos. Anovaremos.

En branu grabamos, de xuru.

Faltar

2011-02-07T12:10:00.003+01:00

faltar: v. Ser necesariu [daqué que nun se tien o nun se fixo pa completar, pa facer daqué]. Falta la fariña pa facer les casadielles. Falten dos quilómetros pa la meta. 2 Desapaecer [una cosa, una persona d’un sitiu]. Falta de casa dende hai tres meses. 3 Nun dir, nun venir. Güei faltó al trabayu. 4 Tratar ensin [respetu a una persona]. Nun sé cómo lu aguanta, siempre-y falta. Nunca-y falté al respetu. 5 Nun cumplir con [daqué]. Faltaron a les sos obligaciones. 6 Romper [un cabu, una tanza]. || Faltar un allegón, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar un branu, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar un cazáu, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar un fervor, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar un real pa la peseta, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar un soleyeru, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar un torniellu, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar una calda, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar una cazada, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar una cuyarada, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar una fayizada, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu]. || Faltar una garfellada, fam. faltar [a daquién] la capacidá, les carauterístiques necesaries [pa razonar, pa facer les coses con xuiciu].

Vou pa Cangas

2011-01-26T11:32:00.003+01:00

Güei tocame volver pa Cangas del Narcea, llamáronme pa facer una presentacios de los mios trabayos audiovisuales.
Ayeri tuvi preparandolos y dime cuenta de... ¡Qué falta de renovalos!!!
Voi pone-yos curtios, dalgún vidioclí y llamádes al sol y a l'aire

Llárimes

2011-01-24T21:10:00.002+01:00

Esfueyando una panoya
colos güeyos enl.lenos d'agua
los mios llabios nun se mueven
ye la tiesta la que fala

Dende un tiempu la cordura
na mio vida enl.loqueció
allargándome la pena
ta pasándome de too

Dende que nun me mirasti
voi facer un firmamentu
pa llenalu colos cachos
que me rompisti per dientro

LLARIMES, LLARIMES, LLARIMES

Güei finasti coles penes
d'una l.luna ensín la miel
escaez la to mirada
ascuares de la to piel

Una moza con dos cares
na cara tién dos cruces
una cruz na to cara
na mio cara nun la busques

Güei les penes nun son penes
que tan feches de papel
ventolín de la montaña
ven y l.lévame con él

LLARIMES, LLARIMES, LLARIMES

de satisfaiciones

2011-01-17T17:33:00.006+01:00

Y de sópitu, mientres tamos peleando pa sacar p’alantre el conciertu del decimu aniversaiu de La Collá Propinde, anúnciennos que tenemos 7 nominaciones a los premios AMAS.

Y a mí préstame pola vida ver na llista a toos ellos, a Héctor Braga como meyor instrumentista y como meyor álbum folk, que se lo merez; a Carás, que sigue engarrandose cola suerte tolos díes, como meyor lletrista; a La Collá con sus 2417 y esa voz d'Esther Fonseca; a Misiva por ser Siempre Fiel a la so parte de la solución; a Zapico col so diseño de Skontra…. Y cómo non, a Skanda, con tolo especial qu'ello tién...

http://acurti.es/Qon

cultu qué?

2011-01-11T23:31:00.003+01:00

Tranca Alborá, marcha’l Derrame, tranca (entá namás) la llibreria de Trabe, El Comercio cola pa Benavente, nun se venden llibros, nun se venden discos,CNN+ ye GH24h, nes charres culturales nun hai más que tres o cuatro engañaos, nel FICX nun s'escosen namás que malpenes 3 sesiones, nos conciertos nun hai xente, inagúrase El Muselón, la mio ropa yá nun fiede los sabados al alborecer ... algo ta cambiando…

Quereres

2011-01-09T15:37:00.003+01:00

[...]
Quisiera un besu emprestau[...]
un aliendu robau
un calor, una pallabra, un relfexu[...]
Quisiere una ponte de madera curvao[..]

nortiada

2011-01-04T14:37:00.003+01:00

[...]
Rondes los mios suaños,
los mios afalagos de sabanes seques y cames vacíes.
Rondes les mios manos
cariciando una nortiada enllena d'engañu.
[...]

Blogues n'ast

2011-01-04T01:13:00.006+01:00

Estos díes podeis votar al meyor blogue n'asturianu. Una buena iniciativa pa potenciar la nuesa llingua, el so usu y la so normalización.

Equí teneis la web http://meyorblogueast.zobyhost.com/

Ehí vais topar un buen puñau de blogues que, de xuru,van prestavos.

rodando

2010-12-30T01:28:00.004+01:00

Va muncho tiempu que nun taba nun rodaxe... ún rodaxe d'estos de cuentinos, de más d'una llocalización, de sensaciones, de lluces, de rincones... echábalo de menos

Fin d'añu

2010-12-24T21:51:00.005+01:00

Y sin cuntar con ello, en 2010 con Algamar sacamos el discu de La Col.lá Propinde, el de Skanda, el de Carás, el de Misiva, el de Fala Non Caduca, el d'Héctor Braga, el de Darbuka, un pocu'l de Skontra y grabamos parte del d'Edu Vigil….

Y sin cuntar con ello, en 2010, Bisarmes salió a la lluz (a la fín) y llevó premiu nel Cabu Peñes y na Academia de la Llingua, y dexé a un llau a Ella y Ariel y robé cuentinos de Sol y Aire…

Y sin cuntar con ello, en 2010 diome por escribir sobre gatos, sobre ti, sobre mares, sobre playes y sableres, sobre mancadures, sobre ti, sobre estaciones abandonaes, sobre solombres, sobre suaños, sobre meses, sobre ti, sobre agua, sobre charcos, sobre ti…

Y sin cuntar con ello, en 2010 yá nun ta y de sópitu volvió y ensin pensalo apaeció…

Y n’esto acabo'l 2010 naguando abriles, esperando sandíes, zreces, esperándote…

Amanez Avientu

2010-12-19T17:32:00.002+01:00

Avientu espierta col sol escolingando de les paredes del cuartu.
Mientres, les gaviotes piquen les ñubes y caricien l’aire frío.
Atapez.

Expolios culturales

2010-12-16T16:14:00.009+01:00

Güei toca falar d'apoderase de coses ayenes, coses que nun son d'ún, pero faise como si sí lo fueren. Y toca falar d'eso polos Premios Andrés Solar que cada añu otorga la Xunta Pola Defensa de la Llingua Asturiana.

A mi namás me robaren dos veces (que yo sepa) (el mesmu personaxe les dos vegaes). Tampoco ye que tenga demasiaes idees estupendes que merezan la pena copiase. Pero fadia, y munches de les veces fai que se te quiten les ganes de siguir teniendo idees, anque lo que tamién ye verdá ye qu'apriendes a tener idees y a guardate les pa ti solo (y eso ye un rollu, porque, a lo menos a mí, préstame cuntar les coses, les idees, les hestories…).

Una vegada, nuna entrevista conxunta, daquién preguntónos por futuros proyectos. El futuru yera un documental. El futuru yera cuntar una hestoria, un cuentu d'esos que son realidá. A los diez díes robáronnos les ganes de cuntar esi cuentu.

Otra vegada, n'otra entrevista conxunta, daquién preguntónos por futuros proyectos. El futuru yera'l presente, el pasáu, la hestoria, los raigaños, los oríxenes, la evolución. El futuru yera la cultura d'un país. Al mes, robáronnos les ganes de paz y diéronnos sed de vengación mortal. Anque sobremanera la mio conciencia cultural (vamos, porque soi tontu) fixo que me sentara y “esfrutara” de lo que podía ser.

Lo de los espolios culturales vien dándose dende tiempos infinitos. L'espoliu cultural forma parte del ser humanu, de les sos civilizaciones. L'apoderase de lo que nun ye nuesu, del trabayu, del esfuerzu y de la conciencia de los demás.

La TPA fai de so'l premiu que la XPDL concede anguaño al programa “Camín de Cantares” que s'emite nesa cadena y que conduz el que ye'l so alma mater, Xosé Ambás.

La TPA expolia la so propia programación, robase a si mesma. El llabor cultural, el llabor de recuperación de la identidá del país, el llabor d'enseñar lo qu'entá perdura, pasa de ser un llabor únicu y esclusiva d’ Ambás, a ser una idea, un llabor y un apueste d'una cadena televisiva que namás caltien en programación una serie de conteníos pa mal cumplir una llei de protección d'un idioma cualesquiera.

Lo más grave del asuntu, nun ye que la TPA faiga de so un premiu que-y dan a un programa qu'emiten. Lo más grave ye faer estensible a sí mesma un premiu que nun la inclúi per nengún llau. Quiero dicir, que la TPA tracamundie la nota de prensa que la XPDL llanza a los medios, incluyéndose a sigo mesma nella, ye una mala praxis. Ye un actu enxitosu, una actitú poco elegante, de nun saber ser profesionales y nun saber reconocer los meritos o idees ayenes.

La TPA roba y expolia la cultura. La TPA nun dexa dignificar el llabor sociocultural d'unu de los pocos que, dende la so humilde conciencia, trata de curiar y dar aliendu a un enfermu terminal como lo ye, la cultura tradicional asturiana.

Una vegada, va tiempu, repití esto mesmu: "P'alantre. Nun importa. Lo importante ye que se vea esi trabayu na pantalla y que llegue a toos. Lo importante ye que la cultura asoleye pente les rendixes y llegue a la xente”.

Allá la conciencia de cada cual.

L'aliendu de lo frío

2010-12-06T23:55:00.006+01:00

Lo frío entró pela puerta, pasó raspiándo'l mio llombu y siguió ensin detenese percorriendo col so aliendu tola paré de piedra .

Esta nueche nun quixi llevantar la cabeza

Cultura ye gratis

2010-12-02T12:03:00.004+01:00

La cultura ye gratis
Malpenes 12 hores dempués de dexar los primeros exemplares del discu de Fala Non Caduca nos sitios d’avezu, yá teniemos pirateau el discu na rede.

Interné ye nación
Interné ye un sitiu perafayadizu pa esparder les propuestes culturales, pa dar a conocer a los creadores y pa echar abaxo el trabayu de toos ellos.

10 € ye un discu (o tres cerveces)
Vamos echar cuentes de lo que cuesta grabar un discu (dempués de muncho regatear):
•Estudiu de grabación: 3200€
•Cópies: 2000€
•Diseñu: 300€
•Viaxes, gasolina, colaboradores, etc. 350€

Esto ponnos nunos 5.850€ .

Nun voi sumar ehí el gastu de viaxes a los locales d’ensayu del grupu, los gastos del alquiler del local d’ensayu, los gastos en papel y boli pa apuntar los temas, los gastos de tomar un manzajú y una bolsa patates Pumarín en mediu ensayu, nin siquiera voi cuntar coles perres que supón, pa los que tienen suerte y trabayen, pedir hores pa dir a grabar. Val, ta bien, tampoco cuntamos colo que cuesta distribuir el discu, nin les hores que se echen en dar vueltes pa ver cómo podemos facer pa que a la xente-y preste el discu pola presentación…

Y total.. vendiéndolos a 10 €, con vender 585 recupérase la inversión…

Creative Commons ye pa copiar
Una cosa ye que saquemos los discos con creative commons, pa que tengan difusión y pa que se puedan escuchar llibremente y la xente nun tenga problemas por poner el discu p’ambientar el so chigre o la so peluquería y otra que saquemos el discu con Creative Commons pa querer tirar perres.

Música ye ocio
Si, a los músicos presta-yos facer música, presta-yos dir a ensayar, dir a tocar… pero ye que presta eso, tocar y facete disfrutar coles sos creaciones. Pa eso nun fai falta grabar un discu, pa eso vas a los conciertos y escucheslos. Quedes sin música en casa.
Tamién pues grabar los conciertos col móvil y ponelo de politono.

El bable ye subvención
Nun ye d’estrañar que la xente dixera que toi chifalu por meteme nel mundo de la edición de discos. Sí, ye verdá que hai dellos discos de los que toi editando que tienen sovenciones, que aforramos bastantes perres. Pero lo que nun pue ser ye que la xente tenga tan poca conciencia de lo que supón pa una discográfica piquiñina el piratear los sos discos el primer día ( o el segundu o el terceru). Pa la discográfica y pal grupu. Porque de benieficiu ye cero. Ni ye bueno pa la banda, ni pa la so promoción, ni pa la so difusión ni pa ná.
Les bandes tienen canales más que afayaizos pa poder dar a conocer les sos obres, la so música, la so propuesta cultural, y de xuru que van facelo.

Conciertu ye gratis
Conciertu y discu de baldre. Home y d’equí a bien poco val más dir preparando merchandaising tamién a coste 0…
Conciertu, discu, camiseta, chapa y bolsa pipes… total.. mientres nos siga prestando facer coses culturales…

Y de sópitu...

2010-11-24T16:46:00.000+01:00

y de sópitu, les películes dexen de tener "polución", y de sópitu les pallabres de V.Erice conserven ensin apodrecer les mios propies pallabres....
[Momentu temporal de reencuentru col cine d'autor y col tiempu únicu d'autor]

48FICX

2010-11-22T12:11:00.003+01:00

El FICX siempre ye igual (nun doi crédito que diga yo esto…)
Unos años más sangrante qu’otros.
Sicasí esti añu tan los güeyos d’Ana Torrent

Formientu

2010-11-18T13:02:00.002+01:00

El mio collaciu Nelón nun supo hasta esti día qué yera lo que-y pasaba.
Notaba un vaciu nel estómadu, pinchacinos per dientro’l so cuerpu y ganes de nun tener ganes de ná.[...]

Remocicando

2010-11-16T03:12:00.005+01:00

Na seronda lleguen momentos nos que toca redecorar la casa. Güei ye tiempu de remocicar la web [www.skancia.com] y sacar de les caxes de cartón vieyos materiales

Cocina de madrugada

2010-11-11T02:51:00.002+01:00

Por un momentu pruyóme qu'esti blogue paeciérase al del Sr. Willson y enseñar al mundu una semeya maraviyosa d'una receta nueva… ta claro que si una receta nun vien nel llibru de Mª Luisa García, nunca va salir a la primera, anque sía por que'l lleldu qu'usasti nun taba bien…

Gorilas

2010-11-08T09:43:00.002+01:00

Con motivu del 50 aniversariu del Club Los Gorilas de Candás, encargárenme facer un audiovisual pa introducir la presentación del llibru conmemorativu.

Y a la xente parez que-yos prestó enforma.

Domingos de mercau

2010-11-07T21:38:00.003+01:00

Mientres calzaba les catiusques abrí la ventana pa sentir más cerca les gotes de lluvia. A los domingos, les cais de Mieres llénense de tienduques ambulantes onde mercar aceitunes grandes, trapinos pa facer manteles y dacuando, paragües pal sol.
Va meses que nun probara les aceitunes grandes. Hoi nun quedaben pa vender.

Preparando la merienda...

2010-11-05T13:50:00.003+01:00

Si lo díz Canal Cocina será así...

56,5 gr. de mantequilla fría, dilida
1 güevu
120ml. de lleche
1 cucharadina de vainilla
60 gr. farina normal
60 gr. farina de repostería
67 gr. d'azucre blanco
½ cuyarada de polvu d'enfornar
1 plizca de sal
70-80 gr. de cachinos de chocolate con leche

Precalentar el fornu a 190ºC
Tolos ingredientes tienen de tar a temperatura ambiente.
Nun bol entemecer los güevos, la lleche y la vainilla.
N'otru bol asitiar les farines tamizado, l'azucre, royal y una plizca de sal.
Vertir los ingredientes húmedos sobre los secos.
Integrar dambos ingredientes cola ayuda d'una espátula, ensin entemecer por demás.
D'últimes amestar el chocolate cortáu a trocitos .
Rellenar les cápsules de papel 3/4 de la so capacidá.
Enfornar na metá del fornu a 190ºC mientres 18 minutos

En el Sillón de Voltaire

2010-11-04T00:48:00.003+01:00

El Sillón de Voltaire ye un sitiu bien afayaizu pa echar un ratín charrando en buena compañia

¿Y qué si t'echo en falta?

2010-11-03T02:19:00.003+01:00

[...] Nin yo miro pa la lluna.Nin sé yá cuntar estrelles porque pierdo la cuenta.
Y les yerbes altes siguen medrando, y les marees xuben y baxen. Y les coses de la mar caltienense nes sableres xabaces de les playes que nun visito.[...]

Y fuera llueve

2010-10-31T01:42:00.000+02:00

Sandies de temporada

2010-10-29T11:24:00.000+02:00

Apuntes pa diálogu d'amor (IX)

2010-10-25T02:57:00.006+02:00

Voi colar
¿Ú?
Nun sé… llóñe.
¿Lloñe de qué?
Lloñe de too, lloñe de too esto. Lloñe de les coses qu'asoceden equí, lloñe de la xente, de les noticies, de les nueches , de los díes, lloñe de la seronda, lloñe de les playes, lloñe de los chigres...
¿Lloñe de mi?
Non, de ti non.

Dende la cañá

2010-10-18T23:41:00.004+02:00

N’aquella tarde, sentí’l fríu per primer vegada.
Calábame dende la cañá hasta lo más superficial de la piel.
Enmudecíase la ciudá a cada pasu.
Nun fui quién a llegar al portal ensin que les llárimes aprucieren en forma de cristal.
L’ascensor tardó’n llegar al cuartu písu más de lo normal y el periódicu que tenía garrau baxu’l brazu cayó al suelu.
Yá nun tenía fuerces pa mantenelu conmigo.
La pesllera abrió y apagaronse les lluces que ciguñaben nel eternu pasiellu comunal.
La nevera enllena de nada.
La despensa vacía de calor.
Y la manta de cuadros abandonada nel maleteru del coche.

Prendo l'ordenador, cola esperanza de que daqué radie y desconxele los mios poros…
Fuera la nueche amiya, emborrinada…

Nueches de seronda

2010-10-10T05:21:00.002+02:00

[...]Nes nueches d'aquella seronda la familia volvió a reunise. Ella volvió a miralu y él nun pudo más qu'esbozar una sorrisa ya esfrutar del momentu [...]

Frixuelos

2010-10-05T16:34:00.002+02:00

200gr farina, 50gr manteca, 4 güevos, ½ litru lleche, 2 cucharaes de zucre, limón, un pocoñín de sal, anís (al gustu)

Nun cuencu mezamos la llechi, la farina, el sal, el limón, l’anís, los güevos, la manteca…

Dexamos reposar

Esperamos pa metelos al sartén a la hora merendar...

Una vez

2010-09-27T22:50:00.005+02:00

Una vez quixi escribite un cuentu
y quedeme nun poema murniu
Una vez quixi escribime un poema
y nun llegué al final [del primer versu]
Una vez quixi quererte tanto
que quedé con ello
Una vez escribite un cuentu
[...]

Apuntes pa un diálogu d'amor (VIII)

2010-09-18T02:33:00.005+02:00

Si tuvieres que quedate con una imaxen de nueso ¿cuál sería?
Cualesquiera
Cualesquiera nun val
Los tos güeyos
¿Los mios güeyos cuando?
Los tos güeyos siempre
Los mios güeyos siempre nun val
Los tos güeyos enantes de que me des un besu

Pintando la lluna

2010-09-12T15:46:00.003+02:00

¿Onde dexasti la sorrisa? ¿por qué andes murniu?
Faltame la lluna dende va un tiempu
Voi pintátela nel cielu pa que nun te falte

Quédate

2010-09-06T23:31:00.004+02:00

Nun tengo conciencia de la última vez que sientiera eses sensaciones de nervios que faen ñacer les formigues que percorren per dientro les piernes, llegando a lo cabero de los deos de la mano, y faciendo que la llingua quede quieta tremando les pallabres que nun son quien a salir. Y namás queda llibre d’elles la mirada.
Y la mirada d’ella nun cambiara, sicasí apártala pa nun cruzase davezu cola que nun soi a quita-y d’encima. Y falamos del tiempu y de les vaques, y de les estrelles, de semeyes de nueche y de cruasanes, y mientres, los güeyos, sin atender a les otres pallabres, falen de lo suyo, de mirar y nun querer nun mirar más. Les manes falen de caricies seles. Y los llabios dicen coses, pa nun se postrar desnudos ente los del otru.

Escríbeme daqué.

Quédate.

Y acabamos falando de Jim Morrison, aunque lo nueso siempre fue’l Roads de Portishead.

L'aire del sur

2010-09-04T14:42:00.002+02:00

Cada vez cuesta más [tener y] facer coses que presten...

L'aire del sur from Pablo A. Quiroga Prendes on Vimeo.

Ayenos

2010-09-02T14:34:00.004+02:00

Baxó la vista, garró’l guxan de lluz ente les sos manines y siguieron charrando, ayenos a la decadencia que los arrodiaba

decadencia

2010-08-31T03:10:00.003+02:00

Sentóse en prau, alzó la vista y, a la fin, pescanció la decandencia

Güeyaes

2010-08-28T14:28:00.002+02:00

Gústenme los güeyos grandes, los que tienen forma de cascoxu, con espirales de color.

Gústenme los güeyos que tienen tastu a almendra y ablana. Gúestenme los redondos como la bola del mundo que guardo nel trasteru.

Gústenme los güeyos que se faen pequeños col sol y con les mirades profundes, los güeyos que lleven paisaxes grabaos, los güeyos que nun son grandes nin pequeños, gústenme amás los pequeños, y los grandonos. Gústenme [en verdá] los güeyos que cuenten coses, los güeyos que miren y descubren, los que ven y quieren ver más.

Gústenme los güeyos que tienen marques de felicidá nes llendes de so. Gústenme los güeyos que espeyen a quien los retrata. Gústenme [muncho] los güeyos colos que mires na playa, los que tan acompañaos d’una sorrisa de tranquilidá.

Y les sorrises presten lo que más

con tastu a sandia

2010-08-26T16:40:00.005+02:00

La verdá ye qu’esti añu nun probara muncho les sandíes, con tolo que me presten. Nun atopara momentu oportunu… y asina iben ocupando la tercer balda de la nevera mientres empodrecien y s’echáben a perder. Igual mercaba una mitá, o un cuartu, y dexábales na mesma bolsuca ruina un día, dos, una selmana, dos… y claro.. nun ye plan andar gastando espaciu na nevera al debalu, porque dempues nun hai onde guardar otres coses que na mio casa creen más importantes.

Lo guapo de les coses prestoses ye que lleguen. Sicasí lleguen a pingarates, mui cuntaes, pero…

¡Cómo presta un cachín de sandia rico al despertar! Y nun hubo falta gastar espaciu, ni tiempu. Namás foi necesariu esfrutar y sentir.

El tastu yera a caricies y afalagos, a hores curties y nueches llargues, a sed de besos y a despertares guapos.
El cachín de sandía dexaba un regustu final a la estrella xornalera y lluna de mar.