Skancia

Sentóse en prau, alzó la vista y, a la fin, pescanció la decandencia

Gústenme los güeyos grandes, los que tienen forma de cascoxu, con espirales de color. Gústenme los güeyos que tienen tastu a almendra y ablana. Gúestenme los redondos como la bola del mundo que guardo nel trasteru. Gústenme los güeyos que se faen pequeños col sol y con les mirades profundes, los güeyos que lleven paisaxes grabaos, los güeyos que nun son grandes nin pequeños, gústenme amás los pequeños, y los grandonos. Gústenme [en verdá] los güeyos que cuenten coses, los güeyos que miren y descubren, los que ven y quieren ver más. Gústenme los güeyos que tienen marques de felicidá nes llendes de so. Gústenme los güeyos que espeyen a quien los retrata. Gústenme [muncho] los güeyos colos que mires na playa, los que tan acompañaos d’una sorrisa de tranquilidá. Y les sorrises presten lo que más

La verdá ye qu’esti añu nun probara muncho les sandíes, con tolo que me presten. Nun atopara momentu oportunu… y asina iben ocupando la tercer balda de la nevera mientres empodrecien y s’echáben a perder. Igual mercaba una mitá, o un cuartu, y dexábales na mesma bolsuca ruina un día, dos, una selmana, dos… y claro.. nun ye plan andar gastando espaciu na nevera al debalu, porque dempues nun hai onde guardar otres coses que na mio casa creen más importantes. Lo guapo de les coses prestoses ye que lleguen. Sicasí lleguen a pingarates, mui cuntaes, pero… ¡Cómo presta un cachín de sandia rico al despertar! Y nun hubo falta gastar espaciu, ni tiempu. Namás foi necesariu esfrutar y sentir. El tastu yera a caricies y afalagos, a hores curties y nueches llargues, a sed de besos y a despertares guapos. El cachín de sandía dexaba un regustu final a la estrella xornalera y lluna de mar.

dexando a un llau les cares murnies, xubieron al escenariu y ficieron tolo bueno que saben

Dos selmanes en Cangas, nos cursos de la UABRA sirven pa delles coses, la primera quitar la contractura esta que taba mantándome. Paez que tumbase una migayina nes piedres que reposen na oriella del riu acabaron con ella. Y sirven pa odiar les trompetes a ciertes hores del día, pa esfrutar de les xiblates, de les músiques y les voces; sirven amás pa mercar botes de saldo, pa probar picadillo d’esi que dicen “pica un poco” (cuando la verdá ye que pica en forma), sirven pa dir a grabar a paisanes que son protagonistas siempre, pa estudiar la decadencia d’una sala de fiestes, pa ver sorrises en güeyos que brillen, pa deprender a reciclar les bolses, pa marchar, pa volver, pa desapaecer, pa pone-y llende a les coses que entá nun la tienen. Dos selmanes en Cangas sirven pa echar de menos, pa querer fuxir d’ello.Sirven pa ver figales, bambús y ótres rareces de la ñatura. Sirve amás pa querer volver a onde antes. Pa tener ganes de mar, salitre, ocle, de coses de la mar, de sol, de merenderu. ...

¿Y si grabamos un díscu? ¿Sí?, yo encantáu... Edu, 4 temas más. Y así, como que nun quier la cosa... sin pensalo. Cómo presten les ilusiones. Y mientres siguimos trabayando n'otres creaciones...y n'otros robos.

Nun me muerdas Un pocoñín... Val, pero na más un pocoñín

La mio vecina suaña arrecostinada na ventana del salón. A la mio vecina llega-y entós l’aruma a sidra escanciao fuera’l chigre d’enfrente mio casa y debaxo la suya. A la mio vecina presten-y muncho los atapeceres. Nel salón tien cinco cuadros vieyos enmarcaos n’oro y madera prieto nos que’l salitre, la borrina y el sol son protagonístes. La mio vecina suaña con volver a los atapeceres d’antaño, a les romeries de la llosa, a la pica’l Cuirnu dende onde esfrutaben del golor a ocle que avarara nel sablón de piedres. Suaña colos atapaceres de pies moyaos d’arena salao, col sabor a mar de los sos besos, con el tautu de la so piel de salitre seco. La mio vecina espierta, métese pa dientro casa, siéntase nel sofá y prende la tele.

Y les melodíes esguilaben peles cañuques de los pumares. Y les povises, nun actu de lliberación, acompañáronles baillando coles notes. N’esti intre, les estrelles, que llevaben una bayura d’años encerraes, cobraron vida pa volver a cuntar hestories. Mentantu, no más fondero’l val.le, acolúmbrense columnes de fumu de otres fogueres de nueche curtía y de los suaños llargos.

Ente les noticies del suplementu cultural semanal de El Comercio y La Voz d'Avilés de güei, José Cezón saca esti reportax tan curiosu d'Algamar Hecho en Asturias Algamar Producciones, que se inició en el campo audiovisual, ha editado seis discos en tan sólo dos años y representa a 17 artistas de la región Las aventuras artísticas más apasionantes surgen, en ocasiones, de la forma más inesperada. Es el caso de Algamar Producciones, que nació en 2006 como empresa cultural enfocada hacia el mundo audiovisual y que, en sólo dos años, ha editado seis discos y reunido un catálogo de diecisiete grupos y cantantes asturianos de la escena rock, folk, fusión u otras músicas. El padre del invento es el joven Pablo Quiroga Prendes, que vive a caballo entre su concejo de Carreño natal y Gijón. La producción musical de Algamar arrancó a finales de 2008, con motivo de un documental que conmemoraba las bodas de plata del Grupo de Baile Tradicional San Félix, de Candás. La edición incluía un d...

En Carrió llueve, pero nun importa, toi en casa. Préstame sentir les gotes de lluvias picando na ventana la cocina mientres preparo la merienda. Préstame muncho, nos díes de lluvia, atopar, no más fodero del horru, caxes de recuerdos suyos y mios, semeyes intautes nes que ver l’espeyu onde mirame, y cartes. Cartes con pallabres manuscrites que falen de lo diario d’aquella y de la nuesa. En Carrió güei de tarde namás falta xente cola qu’echar el tiempu nuna partiduca al risk mientres nel tocadiscos suena esa seleición musical de la esbilla de vinilos vieyos, cassettes de siempre y discos nuevos.

Y de sópitu, desapaeció y yá nun taba. Y de sópitu apaeció la so ausencia ya la desesperación.

Y de verdá que ye un arguyu que l’ Academia la Llingua dé un premiu a un curtiu del que formé parte. Préstame muncho, y tresmíteme eses mesmes sensaciones que me tresmitiera el primer premiu que me dieren, por Aida, nel Festival de Curtios Aula18 va yá pa siete años. Y ye que, nun ye fácil, nel mundiu audiovisual, tomar el determín de trabayar na nuesa llingua. Si vas trabayar n’asturianu ya sabes lo que te queda, nun poder amosar los tos trabayos y quedate nun círculu a cada vuelta más piquiñin. Malpenes pués saltar la “censura” acoplando sotítulos n’ otres llingües reconocies y reconocibles pal “gran públicu”. Pero yo tomé esi camín, y toi contentu. Toi contentu de ser fiel a les mis coses, a mi mesmu, y a esos raigaños culturales. Préstame muncho, y ye una allegria ente tou esi mar de borrina que tapez l’horizonte. http://www.asturies.com/node/11162 http://acurti.es/5Kg

Mientres yo-y dába vueltes a los apuntes de Teodoro Cuesta, la mio vecina d'enfrente, la del últimu pisu, esa qu'afata la repisa de la ventana con flores de temporada, entemecía nuna batedora naranxes, farina y un yogurth natural del país. La mio vecina diose la vuelta y desapaeció pente los armarios baxos de la cocina. Perdíla de vista. La batedora siguía esperándola, inmóvil, enriba la mesa, al llau del fruteru metálicu. Al cachu, volvió apaecer, con un paquete de zucre al que-y faltaben trés cuartes partes. Dempués de midir a güeyu la cantidá esacta, arimó'l paquete a la mesa, púnxo-y la tapa a la batedora y nun tris yá tenía la masa entemecida. Nun contenta cola testura final, inda coyó una cuyar de madera y revolviólo ente preba y preba. Non, paez que nun ta contenta. Unos golpes no fondero de la batedora y otra vegada la cuchar igua la masa. Esta vegada sí. Los deos qu'untara en masa, queden llimpios dempues de pasar por esa boca na qu’asoleya una sorrisa precio...

Y llevantó una muria pa tapar la lluna y nun ver los reflexos espeyaos nos sos güeyos; y cosió la boca pa nun sentir la pallabra amor nos silencios de la soledá; y tapó los oyíos pa nun abrigase coles caricies de los xuxurios qu’ afalagaben; [...]

Un de les coses guapes d'abril y mayu ye que la mesina de la vera la cama enllénase de llibros pa les nueches nes que, namás les lletres ayenes, que siento como propies, fáenme compañía. Llegaron los llibros d'Iris, de Sergio, d'El Suarez, recuperé a Galeano y folié como nengún otru el llibru de Miguel. Güei preséntase, “trenta razóis pra nun medrar”. Siendo sinceru tengo que dicir que costóme una barbaridá acabalu. Nun yera quién a pasar de les primeres diez razones. Una vegada tres otra volvíen emocioname les pallabres d'alcordances y de sentimientos fondos, d’esos nos que s’espeya la bondá del que les escribe. Cerraba'l llibru y al abrilu, llamábenme de nueu les primeres palabres pa nun medrar. COMIGO Podes vir comigo hasta a llúa pr’axudarme a buscar os colores del firmamento; podes viaxar comigo hasta os fondales del mar y protexerme al xuntar as faraguyas del augua; podes chegar comigo hasta el curume da terra y ocuparte de degrumar os llamberetes das nu...

Y n’esa nueche zapiqué nes aristes de la cume y taracé'l mio llarimal de paré de sal. [...]

Y yo necesitaba'l sol de los tos brazos ya’l silenciu de los llabios tuyos cuando tapen los mios [...]

Ta’l cielu azul celeste, ta’l cielu soleyeru, el de ñubes, el de ñubes ya claros, el gris, el cielu de ñebe, el que ciguña coles descargues llétriques, tan los cielos d’Asterix, los de los santos, santes y santines. Tan los cielos poéticos, los que tienen tastu a pizza y nunca madruguen, los cielos empedraos, los cielos despeyaos, los cielos d’atapecer dende’l tobogán de Carrió. Los cielos d’alborecer nes cais d’Uvieu, los cielos dende la cama de casa, los cielos que reflexen la mar, los cielos celosos, los cielos de sofá, manta y palomites. Alcuerdome agora de los cielos de sorrises grandes, de los que faen ñacer l’arcu la vieya, de los cielos cubiertos de ñubes d’algodón de zucre. Los cielos de branu, los de la seronda, los cielos que na primavera traíennos díes de zreces, los cielos d’iviernu y chigres. Ta’l cielu que tas viendo y que yo nun veo. Ta’l cielu d’erasmus, el cielu d’estrelles de guía, el cielu que nun ye cielu, el cielu dibuxau ya'l pintáu. El cielu a cámara llent...

Esta nueche comí galletes. Alcordéme de ti. Les galletes de mio casa nun tienen virutes de chocolate, nin forma de dinosauriu. Miré pa debaxo’l calentador y nun había tarros de cristal de ikea con galletes riques. Esta nueche otra vuelta, alcordéme de ti.