Premiu!

Dempues de recibir esta tardi l'abrazu que inventara ente suaños la otra nueche, llegóme va una hora la segúnda mayor allegría del día (nun tien comparanza cola primera).

Va unes selmanes espublizara equi dellos microrrelatos que mandara a un concursu qu'entamara la xente de la Asociación Xaréos! y la Revista Formientu, pues bien, resulta que prestoyos un d'ellos y creyeron que xunto col de Rubén Rey, merecía ganar esti primer certame del Premiu Formientu de Microrrellatu Mozu.

Dexovos equi lo que dixo'l xuráu:
----------------------------------------

El I Certame de Microrrellatos Mozos «Formientu» yá tien fallu del Xuráu

Xixón, 7 d’ochobre de 2009
L’asociación Xareos! y la revista Formientu, en collaboración cola editorial La Cruz de Grau, convocaron el I Certame de Microrrellatos Mozos «Formientu» “col envís d’afalar la creación lliteraria ente los escritores más mozos y ayudalos a esplorar les sos posibilidaes”.

El xuráu de la primer edición del Premiu Formientu de Microrrellatu Mozu, formaú pol escritor Xuan Xosé Sánchez Vicente; el xerente d’ediciones La Cruz de Grau, Cesar García Santiago; la filóloga y escritora Laura Marcos; l’escritor Benxa Pérez y el director de la revista Formientu, Inaciu Galán, como secretariu, y al traviés de conceyu virtual, decidió declarar ganadores del certame ex aequo a los rellatos que siguen darréu:

-Vivía ente l’angustia y l’espectáculu. Suicidóse en Cuadonga, dempués d’una misa.

-DESPIDIDA:
Quería mover los llabios pero namás foi a zarrar los güeyos.


Una vegada abiertes les pliques resultaron ser obra de Pablo A. Quiroga Prendes y Rubén Rey Menéndez, respectivamente.

El Xuráu decidió otorga-yos accésits a los microrrellatos y autores que siguen darréu:

-Güeyando al pá, el xatu dixo mui enfotáu a la vaca: -Ma, de mayor voi ser llobu.
de Blanca Martínez Sancho

-Pueo resumite la vida en diez minutos. La punta d’un iceberg en mediu l’océanu.
de Raúl García García

-Namás sentila esguilaba pel árbol p’apalpiala, pero’l cielu inda taba lloñe.
-Pal nuesu aniversariu de namoraos regale-y el GPS que la llevó a conocelu.
-De sópitu nun había gravedá. Esquivó’l semáforu pero comiólu la osa mayor.
de Pablo A. Quiroga Prendes


-SECRETU:
Pa cuando algamó’l valor pa cuntá-ylo, ella yá se durmiere.
-NAMÁI UNA IDEA:
Decatóse yá ensin remediu de que la mayor arma de destrucción taba na so mente.
-CARPE DIEM (I):
Dicíen-y: esfruta la vida. Pero naide-y dixo cómo. Enteróse a un añu de morrer.
-ALQUILERES:
Alquílase compañeru de pisu silenciosu.
de Jorge Fernández García


Amás, el xuráu encamienta la espublización de los siguientes microrrellatos:

-Fiede como a primeru de payares. Arume llonxanu: flores ¿algodón y madera?
-Daqué que faiga escaecer la crisis y los dexe'n casa. ¡A! Gripe, por exemplu...
de Paulino Feito Alonso

-Él, que daba’l premiu al ganador, ufiertóme’l troféu a cambiu d’una felación.
de Pablo A. Quiroga


-REGRESU:
Sentíase un estrañu na so casa; hasta que vio la bruesina que-y ficiera´l buelu.
de Rubén Rey Menéndez

-PÁLPITU:
Aportó corriendo a casa y al entrar atopólu nun charcu sangre. Aínda boquexaba.
-SANGRÍN:
Trespasó les puertes cola sorrisa na boca y les manes enllenes de sangre.
-BÍBLICU:
Cuando’l “Verbu” fíxose carne; el “Suxetu” fíxose pan.
-TESTAMENTU:
“Y a elli, nun-y dexo nada”.
de Jorge Fernández García

ENTREGA DE PREMIOS
Los rellatos van espublizase nel númberu 6 de la revista Formientu, mientres que los premios van entregase nel actu de presentación de la mesma publicación, a lo llargo del mes d’ochobre.

--------------------------------------------------

Comentarios

Laura ha dicho que…
Felicidades por tu día lleno de cosas buenas!

Entradas populares de este blog

Cayome un diente