l'equipaxe de Pauline


Nel equipaxe de Alicia y Mar va siempre una bañera, unos zapatucos coxos y un gatu de Cheshire.

Viaxen con la experiencia de cuatro discos a cuestes y acompáñense n’ésti, de la física de l’acurdión diatónicu de David Varela, d’una seición de vientos con saxu, trombón, trompeta y tamién clarinete (Andrés Biribay, Agustín Lara, Toño Gómez), de les cuerdes del contrabaxu de David Casillas, de l’ukelele rebelde, de los platos y tambores de la batería de Eva D.Toca, de la zanfona de Merce Santos, del vigulín d’Ana Fernández y del chelo de María García.

Toos estos elementos ponen los acentos, les comes ya les respiraciones a una maleta, a un equipaxe sonoru, enllenu d’hestories poétiques de lo cotidianu.

Dende 1999, Alicia y Mar vienen viaxando nesti sidecar que tien por nome “Pauline en la playa”, dexando atrás el ruidosu camín de les Undershakers (inda güei echamosles en falta), adentrándose nun pop sele, nun pop de boleros y tangos, nun pop de familia soul y jazz.

Subterfuge abrio-yos el pasu nel año 1999 y elles declararon que nun hai “Nada como el hogar” (1999), llegó dempués la “Tormenta de ranas”(subterfuge,2001), les “Termitas y otras cosas” (subterfuge,2003) y el “Silabario” (subterfuge,2006).

El 1 de Marzu podremos tener ente les nuenes manes “Fisica del Equipaje” (Siesta,2010).

Esti domingu 24 de Xineru del 2010,nel Teatru Xovellanos, y abriendo’l ciclu “Festival de la Pallabra”, enseñáronnoslu.
Mar y Alicia tuvieron acompañes enriba l’escenariu de nueve músicos hasta qu’entró La Bandina al completu pa collaborar nos arreglos d’ún de los temes nuevos y duplicó l’aforu. Aprovecharon la so presencia nel escenario pa facer una reelaboración del so Valse Coxu, cola voz de des dos hermanes Álvarez marcando’l ritmu.

Y n’esti viaxe per un pop que paga la pena degustar, Mar peléase coles guitarres y los pedales ente canción y canción, Alicia pon serenidá y el restu de componentes d’esti grupu d’acentu de salitre aderecen l’atmósfera d’un Teatru Xovellanos recién reformáu. La xente esfruta de les nueves butaques, agora yá por fín cómodes, y zarra los güeyos dexandose llevar canción tres canción a espacios sonoros que se cuelen pelos cinco sentidos. El públicu agradez con aplausos les hestories y les músiques del espectáculu con el que nos deleiten Pauline en la playa.

A la fin, nun nos queda otra qu’esperar al primeru de Marzu pa mercar el so nuevu trabayu, “Física del Equipaje”.

(crónica publicada en Fnast.net)

Comentarios

Entradas populares de este blog

Cayome un diente