Entrevista n'Asturnews

26/02/2010
El cineasta y xestor cultural protagoniza la Entrevista de la selmana

Pablo A. Quiroga Prendes ye cineasta, xestor cultural y dirixe Algamar Producciones, una productora que trabaya d’una manera amplia nel campu de la cultura. Nos últimos meses Algamar presentóse como una de les productores musicales que más crez, mientres Quiroga sigue faciendo cine y ganando premios colos sos trabayos, faciendo hasta dalguna incursión na lliteratura. Falamos con él de la situación de la cultura n’Asturies y de los sos proyectos personales y d’empresa.

-¿Qué lu lleva tomar la iniciativa d’entamar una empresa y a facelo nel campu cultural?

-Lo primero que llegó foi la cultura, el tema empresarial vien dempués, motiváu poles necesidaes técniques de dalgunos proyectos.

L’audiovisual foi la estaya cultural que llegó de primeres con más puxu. Aforré pa mercar una camaruca casera y entamé a xugar con ella y colos mios collacios de Carrió un fríu mes de febreru de va más d’una década.

Esi xuegu de grabar cuentinos inventaos pidíame más medios pa poder contalos curiosos… y ente una cosa y otra llegó un momentu nel que tenía en casa una cámara un pocoñín más curiosa, unos focos y unos micros… y ta claro, qu'eso, esi material, yera pa usalu.
Una bayura curtios y dalgún documental ficieron que dalgunes alministraciones llocales m'encargaren trabayos audiovisuales… y al encargame trabayos pues taben pidiéndome que la cultura la tomara amás como un tema empresarial. Foi un procesu de primeres non buscáu, llegó.

-Cineasta, xestor cultural, promotor musical... el so llabor ye ampliu, ¿nun queda otra pa vivir del trabayu cultural?

-Ye lo malo de les inquietúes culturales… primero llegó l’audiovisual, el cine, pero al empar llegó la música, dempués la lliteratura, el teatru, l’esmolecimientu xeneral pola protección cultural… Inda nun sé daveres si ye posible vivir del trabayu cultural, pero sí tengo bien claro que, nel mio casu, nun ye posible vivir ensin la cultura.

-¿Nun-y da la impresión de que la cultura ta siendo la estaya más maltratada polos gobiernos na coyuntura actual de crisis?
-La cultura, nun sé por qué, pero enxamás se diz que seya una necesidá de primer orde. ¿Ye posible vivir ensin cultura? Sí, ye posible, eso ta claro, pero... ¿paga la pena?

Nos momentos de crisis, seyan grandes o pequeñinos, la cultura ye lo primero en caer de los presupuestos. Ye la estratexa fácil, la que menos va criticar la xente.

Echo en falta un migayina más l’usu del significáu de la pallabra Cultura na educación. Si esa xente que calla, que zarra la boca y nun opina a la escontra d’esa estratexa económica facilona, deprendiera qué ye cultura, los gobiernos diben tener que esforciase más p’algamar y caltener l’equilibriu económicu.

-En pocu tiempu asoleyaron yá dellos discos de grupos como La Col.la Propinde, Sambre o La Tarrancha, ¿qué ufren a los artistes p’atraer a formaciones tan importantes como estes?
-Lo primero ser sinceros con ellos. Los grupos tienen que saber cuál ye’l negociu que la empresa va a facer con ellos. N’Algamar Producciones enseñámos-yos les cifres, lo que cuesta un discu, les posibles sovenciones a les que podemos optar y les cifres de venta actuales.

Dempués de ser sinceros, préstanos que l’abellugu que busquen a la nuesa vera seya candial. Queremos que los grupos que trabayen con nós se sientan bien trataos, y bien consideraos, que noten que l’esfuerciu qu'ellos faen como artistas, se traduza en daqué.

Ye perimportante dar a conocer les creaciones de los grupos, y p'Algamar esto ye fundamental.

-Amás, Algamar Producciones dedícase a la xestión cutural, ¿cómo ve’l desenrrollu de la xestión cultural n’Asturies?

-Asturies tien milenta posibilidaes culturales, pero paez que'l marquetin cultural ta copao por trés o cuatro eventos o espacios.

De cara al públicu, a esi públicu xeneralista, n’Asturies namás esiste La Llaboral, la temporada d’ópera, el festival de cine y poco más.

Los xestores culturales de los conceyos asturianos, tendríen que deprender de les estratexes de visibilización qu’usen estos grandes espacios culturales pa llevar el so “productu” a esi públicu non especializáu.


-Cómo cineasta, facíase apocayá col premiu Cabu Peñes de curtiumetraxes con “Bisarmes”, ¿qué mos pue cuntar d’esti curtiu?

-Ye un curtiu dirixíu ente Francico Martínez Peláez y yo.

La hestoria, el rellatu de Bisarmes, escribímosla va yá unos añucos, y hasta agora nun fuimos quien a poder llevalu a la “gran pantalla”.

Apetecíamos muncho poder cuntar pa esti curtiu con Txema Blasco, un actor vascu que ye bien conocíu per Asturies por mor del so papel en Carne de Gallina y otres películes, amás de cuntar cola presencia de Marisa Vallejo y Fernando Marrot.

A Txema Blasco conocílu cuando lu llamé pa participar na adaptación musico-teatral de “José”, la obra de Palacio Valdés, que ficimos en Candás, nuna nueche de finales del branu del añu 2004. Dende esa fecha, tenemos una rellación candial mui prestosa.

Marisa y Win (Fernado Marrot), apaecieron daquella tamién, y a Fran y a mi, prestábamos tener actores de gran talla pa esti trabayu, Naide encaxaba meyor nos papeles qu’ellos.

Pa Pelayo Prendes ye la so primer apaición cinematográfica, y pol resultáu , augúro-y un bon porvenir.

Bisarmes ye una hestoria de mieu, de terror nel llar. Un terror que s’acentúa cola música del xixones Javier Suárez (Jahzzar). Tamos percontentos col resultáu.

-¿Ta inmersu en dalgún trabayu cinematográficu nuevu?

-Estos díes toi finando los preparativos pa entamar el rodaxe d’un documental al rodiu de los 25 años de la Xunta pola Defensa de la Llingua Asturiana. Ye un proyeutu que quixere entamar l’añu pasáu, pero nun foi 2009 un añu bonu pa dedica-y tiempu a les coses que más me prestaben, asina qu'esti proyectu tuvi d’aplazalu.

Tamién tamos cola preproducción de l'adaptación del rellatu “Ella y Ariel”, de David Artime Coto, que ganó’l concursu de rellatu eróticu de Ribeseya en 2009.

Ye esti, un trabayu diferente a los que venía faciendo na estaya audiovisual del curtiumetraxe. Apetézme xugar con llinguax visual nuevu pa min, amás de la tematica, que supón trabayar muncho pa llograr un tratamientu de guión mui cuidáu.

-¿Qué proyectos ta preparando agora Algamar Producciones?

-Lo que pensábemos que diba ser una cosa puntual, paez que nesti 2010 va ser lo que centre los proyectos de la productora. Refiérome al mundu musical.

Misiva, el grupu de punkrock de Grau que tuvieren finalistas nos premios de l’Academia de la Música y del Premiu al Meyor cantar d’esti añu, va asoleyar el so primer trabayu llargu pal mes d’abril. Tamos con munches ganes de poder enseña-yos a la xente el bon llabor d’estos mozos.

Skanda tamién ta finando la grabación del que sedrá'l so quintu discu y bono... dalguna cosuca más tenemos pendientes. 2010 tien que ser l’añu de consolidación de la estaya musical dientro la productora.

Seguiremos atendiendo a les llamaes que nos encarguen documentales o dalgún otru trabayu audiovisual, y queremos poner n’alza'l nuesu llabor como xestores culturales especializaos n’eventos.


De xuru que vamos inventar dalguna cosa pa intentar facer que la cultura siga teniendo una voz con nome propiu nesti país.

http://www.asturnews.com/index2008.php?idn=9337