La Habana

Día 0:
Nun se...munches. Munches hores ehí enriba. 


Nueche 0: 

Nel Malecom les guitarres siguen tando muncho más presentes que'l soníu ranciu de la música enlatada en teléfonos móviles. Los mozos traten de ganase con elles el corazón y los bolsiellos de moces y turistes. Los coches Lada llancen ritmos tecno noventeru peles sos ventanilles. Nengún coche baxa de los 90-100km/h nesti paséu marín. Fai chornu y humedá. La cai tá petada de xente.


Día 1: 
En La Habana vieya hai escueles de tres pisos onde van 196 neños y neñes de 5 a 11 años a deprender la educación básica.Mañana tienen la fiesta de fin de cursu nesta. Les maestres y la directora quéxense de la tremenda escasez de materiales. Tamién muéstren con arguyu los trabayos de l'alumnáu. Nada más noble y humanu qu'una escuela

Tarde 1: 
La Habana vieya ye decadente. El barriu nun son les cais atestaes de turistes a la gueta d'un mediocre 'mojito' en La Bodeguita del Medio.

Día 2: 
Nel barriu del Vedado les cases coloniales caltienen vivos los caducos recuerdos de la burguesía cubana. Ente la 19 y la 21, l'horizonte vese afeáu poles altes edificaciones hoteleres que, disperses, quixeron asomase al Malecón.

Tarde 2: 
Carolina ta nerviosa y gárrase fuerte de la mano del pá, Alberto Meneses. Ye la primer vegada que se tira dende'l Malecón. Brian tien 7 añinos y pa él tamién foi güei la primera. "Siéntome como si fuere piquiñín pero al mesmu tiempu mui grande y fuerte" espétame namás salir del agua. En La Habana hai que tener tiempu pa echalo falando y conociendo a la so xente.

Día 3: 
Los sábados y domingos, nel Paséu de Martí ,o Paséu del Prado, cerca de cortar con Colón, más de mediu centenar d'artistes del proyectu Colectivu-cultural Imagen3 ponen los sos puestos onde poder mercar interesantísimes obres plástiques, preciosos grabados, artesanía textil... amás, de forma altruista, dan clases a cualquiera que quiera deprender la técnica de creación. El fiu de Mayte González ayuda nel puestu de la ma. Él ta perinteresáu nel arte audiovisual y cuéntame cómo ta'l panorama.

Tarde 3: 
Hai dos tipos de cais en La Habana. La cai San Miguel pertenez a la xente. Una cuadra penriba asítiase la cai San Rafael. Esta cai pasó de ser de la xente a ser un impersonal intentu de cai céntrico-comercial de cualesquier ciudá.

Día 4: 
La Habana ta estrao de basura peles esquines. Sicasí, per metru cuadráu, hai bastantes más artístes. Marcho fascináu de les creaciones alternatives que m'alcontré nesti primer averamientu. 

Tarde 4: 
En Coppelia hai dos coles, una pa residentes (a la mandrecha) y otra pa foriatos (la piquiñuca de la manzorga). Dicen que anque tengas qu'echar tiempu y tiempu esperando, los xelaos que ponen na cola de residentes paguen la pena. Veremos 

Día 5: 
Hai dellos medios de tresporte públicu en La Habana. Autobuses de los Simpsons, autocares del alsa, autobus municipal, bus turísticu, taxi, vieyos carros americanos, camionetes y Cocotaxis. Los Cocotaxis son unes motos acopláes a una estructura de fibra de carbono con forma de mediu cocu. Non, nun tienen pinta de mui segures pero son simpátiques. 

Tarde 5: 
Pa llegar a les playes del este, a la Playa de Santa María, la meyor manera ye garrar la llínia T3, na Plaza Central, que cuesta 5 cuc ida y vuelta. La Playa de Santa María ye un sablón grandísimu onde se reunen familes habaneres y turístes. Toles guies aconseyen una zona determinada de la playa, pero nun ta de más el pasiar un pocoñín fuera de les llendes.

Día 6: 
Milagros fai puros dende va 51 años, 20 de cara a los turistes nel Hotel Nacional. Milagros enseña con arguyu una semeya de cuando yera una mocina de 19 años trabayando na fábrica Romeo y Julieta. Esplícame entusiasmada tol procesu y dizme qu'hai que dir a Viñales pa saboriar el meyor tabacu.


Tarde 6: 
Lucky Luciano anduvo un tiempu peles suits del Hotel Nacional. El so cuartu comunicaba direutamente col d'al lláu, onde siempre s'agospiaba Frank Sinatra. Los sos acuerdos siempre se zarraben ellí. Nunca enxamás se-yos vio xuntos nenyures. La reputación de Sinatra caería en picau si lu rellacionaren cola mafia

Comentarios

Entradas populares de este blog

Cayome un diente