Skancia

La primera vegada que subí a Luiña la carretera taba n’obres. Sicasí supongo que si nun tuviere asina, mariárame igual. La escuelina, grande, llena de xente minero, paezme que ta a piques de desapaecer. “Hai una maestrina d’inglés qué…” Y llegamos a Cangas, dos díes festexando l’amor y l’amistá. Dos díes enllenos de tenrura y rises, de llárimes d’emoción y nudos de corbata nes gargantes de tola xente que tábemos ocupando’l xardín.

  Sigue vaciándose a golpes de destín y de vida.   La llaceria y les llárimes inunden l’atmósfera fedienta de los recuerdos d’infancia. Perdimos y deshubicámonos. Nun sabemos cuál ye’l sitiu de nueso. Namás les fatalidades consiguen acercanos al cristal, a la muria que llenda les nueses desgracies.  

  Enxamas la cruzamos , quedamos siempre na faza del cantil. Dende ehí, cola lluz de la lluna   faciendo solombres nes nueses paredes   de deséu, allumaben los güeyos d’ella pa colos mios y los mios pa colos d'ella   [...]  

  Güei, dempués de munchu tiempu, volví. Descubrí tolo que creciera n'esti tiempu el vacíu. Contemplelu na so inmensidá.  

  Sentose nel primer bancu del andén númberu 3.   El tren esperaba coles puertes abiertes. Al cabu d'un tiempu, escuchóse'l   pitíu de salida, zarráronse les puertes y el tren abandonó la estación. Foi xustu nesi momentu cuando se llevantó del bancu, y ensin quitar la vista del tren, averose al ventanu a pidir un billete pal viaxe.    

Llisboa ye lluz y frío. La lluz de Llisboa manca a los güeyos y los reseca enantes de llorar. Llisboa manca. El fríu ye nuevo. Nun tengo recuerdu de conocelu d'antes. El cielu de Llisboa nun tien más colores que l'azul. Perdió el blancu. Les ñubes desapaecieron.

Esperando polos trenes que pasen y nun vuelven, arrecostináu nun bancu del andén. Esperando. Naguando por acolumbrar nel infinitu el rastru que dexen nes ñubes. Preparáu pa pillar a correr hasta’l fin del mundu, hasta llegar a la so vera.   

Pa dir faciendo boca, mientres llega J, mayu trae consigo la Selmana de les Lletres, con munches coses guapes amás de la mani,  les primeres tardes de pipes y sidra, los conciertos al rodiu del primeru de mayu... Y d'equí a una semana vuelvo a Lisboa. Dícenme que yá nun ye la mesma que dexé. [¿Pero quién quiere ser feliz, pudiendo ser frustración o miseria compartida?]

D’aquella esti miércoles yera xueves y entá quedaba un día eternu pal sábadu. Y yo taba esperando cola impaciencia propia del momentu, y coles inagotables ganes de blincar que aparecieron. Y el viernes nun acababa de pasar, y les hores multiplicábense por diez. D’aquella, yo nun yera esti. D’aquella, yo nun yera esti. Y d’aquella, la imaxen al zarrar los güeyos yera la mesma que la d’esta nueche   Y sigo zarrándolos pa imaxinate

L'otru día fuimos Pablo de María y yo a que nos ficieren  una entrevista al plató más friu del mundo. Pa mí que nun llegaríemos a los 5ºC ellí... creo que nótasenos na voz... Esto ye'l auténticu Ts-screener d'esa entrevistuca. (Ye que dixéronnos que tardaríen unos meses en poder danos una copia y nun me quedaben cintes vacíes de Vhs)

Y pa celebralo escapé al norte, a enllename de salitre mientres acolumbraba les tentaciones no más fondero d'aquella realidá...

Pela tarde decatose de que yá nun-y quedaba naide a quien cuntar les coses de tolos díes. El panaderu pasó, como tolos díes, demasiao rápido. Malpenes tuvo tiempu pa comenta-y que yá nun quería más periódicos esa selmana. Les berces de la güerta espoxigaben ensin control, echando embaxo los palos de los tomates que dexara de la otra temporada. Miró pa la casa vacía. Les persianes a mediu baxar, la portiella pesllada, la terrazuca enllena de nada. Xiró, miró pa la otra casa, pa la suya. Namás taba él nel mediu del ermu vacíu que, pasín ente pasu, crecía y diba comiendo tolo que conociera. Cansó. Cansó d’esperar. De nueche abrió la camisa, empapó’l piyama con llárimes de sal y garró’l primer tren. Nun tuvo tiempu a despidise de mí.

El xueves voi dir a Corvera a enseñar una migayina d'eses coses que robé y que plasmé na retina de dalguien. Préstame echar vista atras y ver el futuru más cerca. Préstame tar robando-yos el tiempu a xente tan bueno. Préstame tar preparando algo tan guapo.

Les muries de la ciudá mírenme y dícenme coses a la cara. Non, nun toles muries. Namas les que me miren a la cara cuando yo les miro de frente. De tarde, de la que pasiaba pente caleyes asfaltaes de lletres, el mesmu suelu abria’l mio subconsciente y   inundábalu de pallabres encadenaes, ascendentes y descendentes, del revés y del drechu. Dempués, al salir del shock, les muries de la ciudá dicíenmelo a la cara, insultábenme. Yo asumilo. Baxe la cabeza y nun miré más.  

Namás entrar al patiu, l’arume a ocle y salitre métensete dientro y faense fuertes. Cuatrocientos guelpes funden les rexes que separten la escuela del sablón [enllenu de coses de la mar]. Dende la cancha de la escuela acolúmbrase l’horizonte del norte de la talaya. Mentanto, los suaños repítense cuasi reales esperando la nortiada friolera.    

Esti añu cambio occidente por oriente, monte por mar, escuelina por escuelona... Tocame conocer de cerca a los neños y neñes de Ribeseya. Mañana entama la nueva aventura.

Güei amaneció, a la fin, la Caleya. Y a mi eso emicióname mucho. Sientolo propio.

El primer capítulu de la mio aventura como maestru peles escueles d'Asturies acaba esti mes. Toca zarrar el maletu colos deberes, les fiches, les hestóries y los cuentinos de les neñes y los neños, y abrir la caxa del audiovisual pa facer dalguna cosuca curiosa esti mes qu'entra. Mentantu, mientres preparo les memories propies del cursu, entrevístennos pa que cuntemos cómo se trata de concienciar a un pueblu pa que tome en consideración so suyo.

Nel espaciu "Naguando" del programa El Tren de la RPA, ficieronme ayer una entrevistuca al rodiu del spot que los escolinos del CRA ficieron pa promocionar la matriculación en llingua asturiana. Les neñes y neños tan encantaos cola "fama" que tan garrando

Tamién hai cielos que, vistos nel intre d’abrir los güeyos al sol, equí, nesti suelu, cola perspeutiva de los cables llenderos, fáense inalcanzables. Les andarines pasen como sputniks, atraviesen les falses llendes y esaparecen baillando. Zarro los güeyos ceguñando.